दुर्ग। छत्तीसगढ़ के दुर्ग जिला के भिलाई म एक मुर्गा के अपहरण के शिकायत पुलिस थाना म दर्ज कराये गेहे । शिकायतकर्ता ह मुर्गा के अपहरण के आरोप अपन ही बेटा उपर लगाइस हे। छोटेलाल के शिकायत म भट्टी पुलिस ह ओकर बेटा शम्भू के खिलाफ शिकायत दर्ज कर के तलाश सुरु कर दीस हे।
भिलाई के सेक्टर-1 म रहइया छोटेलाल ह थाना म शिकायत करे हे कि मुर्गा ओकर कलेजा के टुकड़ा रिहिस हे, ओला देख के ही वो ह जिंदा रहत हवय। छोटेलाल ह अपन सगे बेटा शम्भू उपर मुर्गा के अपहरण के आरोप लगात हुए गिरफ्तारी के मांग करिन हे। छोटेलाल ह बताइस कि ओ ह बड़े लाड़ प्यार ले मुर्गा ल पाले रिहिस हे।
छोटेलाल के मुताबिक, ओकर ले मुर्गा ल प्यार अतका अटूट रिहिस हे कि वो मुर्गा ह इंसानी भाषा समझत रिहिस हे। लेकिन मोर शराबी बेटा ह घर ले 5 हजार रुपिया अउ मोर जिगर के टुकड़ा मुर्गा ल लेके फरार हो गिस हे। छोटेलाल ह पुलिस ले कहिन कि ओला 5 हजार नइ चाही, लेकिन मोला मोर मुर्गा चाही।
