विशेष लेख : प्रकृति के गोद म स्थित गगनई जलाशय म नौकायन के भरपूर आनंद ले सकत हें पर्यटक
गौरेला पेंड्रा मरवाही। नवगठित जीपीएम जिला प्राकृतिक मनोरम दृश्य ले भरे-पूरे जिला हे। ऐतिहासिक, धार्मिक अउ प्राकृतिक पर्यटन स्थल ले विद्यमान जिला म प्रकृति के गोद म स्थित गगनई जलाशय म पर्यटक नौकायन के भरपूर आनंद ले सकत हें। जिला मुख्यालय गौरेला ले लगभग 30 किलोमीटर के दूरी म स्थित गंगनई जलाशय (नेचर कैंप) प्रकृति प्रेमी मन बर खास जगह मन ले एक हे। इहां पर्यटक मन के ठहरे अउ खाए-पीए के संग मनोरंजन बर नौका विहार के सुविधा उपलब्ध हे।
स्थानीय लोगन मन के संग बड़का संख्या म पर्यटक अपन परिवार के संग पिकनिक मनाए बर इहां पहुंचथे। इहाँ स्थित सन्सेट पॉइंट ले झील म डूबत सूरज अउ चारो कोती पहाड़ के सुघ्घर दृश्य इहां अवइया पर्यटक मन के मन मोह लेथे। सूरज के लालिमा झील के पानी म पड़थे त दृश्य देखत ही बनथे अउ एक अलौकिक आनंद मिलथे। इहां बने झील म बोटिंग के सुविधा हे। संग म वन विभाग द्वारा बनाए गे सर्व सुविधायुक्त कमरा घलो हें, जिहां पर्यटक परिवार के संग ठहर सकत हें। खाए – पीए बर कैंटिन सुविधा घलो उपलब्ध हे।
जिला प्रशासन द्वारा गठित स्थानीय पर्यटन समिति ह इहां नाइट कैम्पिंग, ट्रेकिंग, पक्षीदर्शन जइसन अनेक मनोरंजक गतिविधी संचालित करत हे। गगनई नेचर कैंप भालू के रहवास वाला जंगल के तीर बने हे। इहाँ म वन विभाग ह पर्यावरण चेतना केंद्र स्थापित करे गे हे, जेन ह भालु मन के संरक्षण बर जागरूकता फैलाए के काम करत हे। इहाँ आत-जात भालू के दर्शन घलो हो जाथे। इहाँ स्थित सेल्फ़ी पॉइंट स्थानीय लोगन मन के बीच बहुत प्रसिद्ध हे। इहाँ म स्कूल-कॉलेज के लइका मन बर दिन भर बर नवाचार कैम्प घलो विशेष मांग म आयोजित करे जाते हे। गगनई नेचर कैम्प म बारोमाह सैलानी मन के तांता लगे रहिथे।
