ब्लैक ड्रेस पहिन के प्रदर्शन करिस हे नर्स मन ह

रायपुर।अपन मांग मन ल लेके प्रदेश अउ मेकाहारा के नर्स मन द्वारा आंदोलन करे जात हे।विश्व नर्स दिवस म आंदोलन के चौथा चरण म शनिवार के नर्स मन ह ब्लैक ड्रेस पहिन के विरोध दर्ज कराइस। लंबित मांग मन ल लेके पीछू कतको बच्छर ले आंदोलनरत नर्स मन ह मांग पूरी नइ होय म पर अब 18 मई ले प्रदेशव्यापी बेमुद्दत असहयोग आंदोलन के चेतावनी दीस हे।
वइसे भी मेकाहारा के मरीज मन म इलाज ल लेके नाराजगी हवय, उपर ले नर्स मन के ये आंदोलन ले एक बेर फेर स्वास्थ व्यवस्था चरमरा जाही। इधर नर्स ह अपन आंदोलन ल लेके अडिग रहे के मूड बना डरे हे। छत्तीसगढ़ परिचालिका कर्मचारी कल्याण संघ के प्रांतीय उप सचिव डॉ.रीना राजपूत के कहिना हे कि बार-बार के आश्वासन के बाद घलो नर्समन के ग्रेड पे समेत कई लंबित मांग मन म धियान नइ दे जात हे।अइसे म प्रदेश भर के 3 हजार नर्स मन बेमुद्दत आंदोलन म विवश हे। ब्लैक ड्रेस पहिन के शनिवार के जमो प्रदेश म नर्स मन ह विरोध प्रदर्शन करिन हे।आंदोलन के आगू चरन म 18 मई ले असहयोग आंदोलन चलाए जाही
.