युवा महोत्सव म छात्र मन दिखाही अपन प्रतिभा, देशभक्ति गीत के संगे-संग होही बड़का आयोजन

जय जोहार रायपुर… इंदिरा गांधी कृषि विश्वविद्यालय म पांच दिन के 20 वां अखिल भारतीय अंतर कृषि विश्वविद्यालय युवा महोत्सव आठ फरवरी ले होही। एखर आयोजन ल इंदिरा गांधी कृषि विश्वविद्यालय रायपुर अउ भारतीय कृषि अनुसंधान परिषद नई दिल्ली ह करही। ए महोत्सव म 70 विश्वविद्यालय मन के लगभग 2500 प्रतिभागी मन ह हिस्सा लेही।

एखर संगे-संग अलग-अलग प्रतियोगिता म प्रतिभागी मन ह अपन-अपन कला घलो दिखाही। इंदिरा गांधी कृषि विश्वविद्यालय के अधिष्ठाता डॉ. जी के श्रीवास्तव ह बताइन कि पांच दिवसीय एग्री यूनिफेस्ट के बेरा म 18 प्रतियोगिता के आयोजन होही। ए मउका म देशभक्ति गीत, लाइट वोकल, समूह गीत, लोक नृत्य अउ वाद विवाद प्रतियोगिता के आयोजन करे जाही।