राष्ट्रपति कोविंद के दउरा ल ऐतिहासिक बनाना चाहत हे रमन सरकार

रायपुर। राष्ट्रपति रामनाथ कोविंद ह अपन राष्ट्रपति बनने के पहिली सालगिरह म बस्तर आव त हे। उंखर ये दउरा ल रमन सरकार ह ऐतिहासिक बनाना चाहत हे।
राष्ट्रपति ह 25 अउ 26 जुलाई के दंतेवाड़ा व बस्तर जिला के दउरा करही। मुख्यमंत्री ह दूनो जिला के कलेक्टर , पुलिस अधीक्षक अउ संबंधित बिभाग मन के वरिस्ठ अधिकारी मन ले राष्ट्रपति के प्रस्तावित कारय करमकरम मन बर चलत तइयारी मन के जानकारी लीस । राष्ट्रपति ह पाछू बछर 5 अउ 6 नवंबर के रायपुर प्रवास म आए रहिन हे। उमन ह पांच नवंबर के नवा रायपुर म आयोजित पांच दिवसीय राज्योत्सव के समापन समारोह म मुख्य अतिथि रूप म आय रहिन हे।
मुख्यमंत्री डॉ रमन सिंह ह बइठक म राष्ट्रपति के दंतेवाड़ा अउ बस्तर जिला के कारयकरम मन के तइयारी के रिपोरट लीस। समीक्षा बइठक म स्कूल सिक्छा अउ आदिम जाति विकास मंत्री केदार कश्यप, वन और विधि मंत्री महेश गागड़ा, लोक निरमान, आवास अउ पर्यावरन मंत्री राजेश मूणत, मुख्य सचिव अजय सिंह, वन विभाग के अपर मुख्य सचिव सीके खेतान, पंचायत अउ ग्रामीन विकास विभाग के अपर मुख्य सचिव आरपी मंडल, मुख्यमंत्री के प्रमुख सचिव अमन कुमार सिंह आदि सामिल रहिन हे।
किसान मन ले मिलही राष्ट्रपति कोविंद ह
राष्ट्रपति ह छत्तीसगढ़ प्रवास के दउरान दंतेवाड़ा जिला म जैविक खेती करइया किसान मन ले मुलाकात करही। येखर संगे-संग गांव जावंगा म एजुकेसन सिटी के भ्रमन अउ उहां के लइका मन ले मुलाकात, गांव हिरानार म वनवासी कल्यान आश्रम स्कूल के भ्रमन अउ इहे बस्तरिया भोजन करही, चित्रकोट जलप्रपात ल देखही अउ जगदलपुर के मेडिकल कॉलेज अस्पताल भवन के लोकारपन करही।