कहिन सच ए हाबे कि भाजपा शासनकाल ले कम बिजली कटौती कांग्रेस सरकार म होए हे।
रायपुर.“भाजपा ह अपन 15 बछर के शासनकाल म बिजली ले लेके गंभीरता ले काम करे होतिस त आज छत्तीसगढ़ ओ हालत नई रहितिस जेन आज हे। सच तो ए हाबे कि भाजपा शासनकाल म बिजलीघर ले लेके ट्रांसमिशन तक जम्मो कुछ भ्रष्टाचार अऊ कमीशनखोरी के गिरफ्त म रहे हे। अईसन म भाजपा बिजली कटौती ल लेके आंदोलन के बात करत हे।“ ए कहिना हे कांग्रेस संचार विभाग के मुखिया शैलेश नितिन त्रिवेदी के जेन ह कहिन कि पाछू के पांच बछर के पांच महीना म कटौती के रिपोर्ट ह बतावत हे कि भाजपा शासनकाल म पिछले साल सवा लाख घंटा बिजली ह बंद रिहिस। फेर कांग्रेस शासन के आंकड़ा ल देख लेन त एक लाख घंटा ले कम हे।
श्री त्रिवेदी ह कहिन कि घटिया ट्रांसफार्मर अऊ दूसर बिजली उपकरण रमन सिंह के सरकार म खरीदे गे रिहिस। ऐखरे कारण एखर जले अऊ ओवरलोड ले ट्रीप होत हे। हमर सरकार म प्री-मानसून मेंटेंनेस ल भाजपा ह सुनियोजित तरीका ले पॉवर कट के रुप म प्रचारित करे के काम म जुट गे हे। ओमन आरोप लगाईन कि हालत ल बिगाड़े बर प्री-मानसून मेंटेंनेन्स, ओवरलोड ट्रिपिंग अऊ घटिया क्वालिटी के बिजली उपकरण मन के बार-बार खराब होए के मामला ल पूर्व भाजपा सरकार के 15 बछर ले विद्युत मंडल म उपकृत करे के उद्देश्य ले घुसाए गे संघी अधिकारी मन झूठमूठ पावर कट कहिके मंडल के खेलाफ दुष्प्रचार म लगे हे। कांग्रेस सरकार ह तो प्रदेश म बिजली के मांग ले ज्यादा उत्पादन के कीर्तिमान स्थापित करे हे। एखर ले बौखलाके जन-विरोधी रवईया के उजागर होए ले डूबत भाजपा ह जम्मो मामला म झूठ के सहारा लेवत हे।
श्री त्रिवेदी ह पाइंट टू पाइंट जानकारी दे के भाजपा उपर आरोप लगाए हे का हे पाइंट पढ़व…
- बिजली के समस्या पीछू के सरकार रमन सिंह के देन हरे।
- भ्रष्टाचार अऊ कमीशनखोरी ह जम्मो बिजली विभाग के तंत्र ल नुकसान पहुंचाए हे।
- बिजली का बिल हाफ करे ले घबराए भाजपा जनता ल भ्रमित करे के परयास करत हे।
- 15 बछर म रमन सरकार उपर ए आरोप लगाए हे कि सरकार के सौभाग्य योजना के लक्छ ल पूरा करे के हड़बड़ी म बिना ट्रांसमीशन लाईन के केपिसीटी बढ़ाईन, ट्रांसफार्मर मन म अऊ सब-स्टेशन मन ल बिना क्षमता के बढ़ाईन, नवा ट्रांसफार्मर अऊ नवा सब-स्टेशन लगाए लोड बढ़ा दे गे रिहिन। अऊ त अऊ आधा अधूरा काम करे गे रहिस, ऐमा जमके भ्रष्टाचार घलो होईस। एखर सती बिजली बार-बार गुल होवत हे अऊ आम जनता ल असुविधा होवत हे।
- पावर कंपनी पाछू के बछर ले अधिक बिजली का रिकार्ड उत्पादन करे हे। बिजली के उत्पादन लगभग 4444 मेगावाट तक होवत हे अऊ प्रदेश म बिजली के मांग हावे 4416 मेगावाट के।
- बिजली के प्रदेश म कोनों कमीं नई हे। फेर पाछू के समय उच्च गुणवत्ता वाला उपकरण मन के खरीदी नई करे गे रिहिस। संगे-संग करमचारी मन के समस्या ल घलो दूर नई करे गे रिहिस।
- पाछू के बछर 15 साल म करमचारी मन के कोनों नवा भरती नई करे गे हे।
- करमचारी मन के रिटायरमेंट अऊ मृत्यु हो जाए ले ओखर पद खाली हो गे जेन ल घलो नई भरे गिस।
- एखर ले ठीक ढंग ले लाईन के रख-रखाव परभावित होए हे।
- भाजपा सरकार ह विद्युत कंपनी ल खस्ताहाल छोड़के गे हे जिन ल सुधारे के आवश्यकता हे।
