गुरूजी ह अपन संविलियन ल बनईस यादगार, स्कूल म खुद के खरचा म बनवईस प्रवेश द्वार

बिलासपुर। एक झन गुरूजी ह अपन संविलियन ल यादगार बनाए बर खुद के खरचा म स्कूल के प्रवेश द्वार ल बना के मिसाल पेस करे हे। वो गुरूजी के नाम अमित कुमार नामदेव हरे। जेन ह राज्य के आदिवासी बाहुल्य इलाका म स्थित सासकीय उच्चतर माध्यमकि साला सल्का नवागांव म पदस्थ।

गुरूजी अमित कुमार नामदेव ह बतईन कि वो ह ये स्कूल म पाछू के आठ साल ले कार्यरत हे। स्कूल म प्रवेश द्वार के नई रिहिस, बिना बाउंड्रीवाल के कारन स्कूल म अनुसासन संबंधी समस्या घलो आवत रहीस, उंहे रात म  आवारा पशु अउ असामाजिक तत्व के जमावड़ा राहय, जेकर सती साला परिसर म गंदगी फैले राहय।

वो ह अपन संविलियन ल यादगार बनाए बर अउ स्कूल के मुख्य समस्या के समाधान करे बर खुद के खरचा म प्रवेश द्वार के निर्माण करवाईस हे।

स्कूल के प्राचार्य भानुप्रताप जायसवाल ह बतईन कि हमर स्कूल के मुख्य समस्या के समाधान शिक्षक अमित नामदेव ह दूर करिन हे। नामदेव स्कूल म अपन नियुक्ति से ही कई क्षेत्र म विद्यार्थी मन के मार्गदर्शन करत हे। वो ह प्रतियोगी परीक्षा लईका मन के मार्गदर्शन करथे, स्कूल म कंप्यूटर शिक्षण म घलो अमित नामदेव के सहयोग हे।  संगे-संग अपन रचनात्मक सोच ले विद्यालय के विकास म सदा सहयोग करत हे।