जय जोहार । सीएम भूपेश बघेल (CM Bhupesh Baghel) ह बुधवार के रायपुर पश्चिम विधानसभा म भेंट-मुलाकात के दउरान समता कालोनी के अग्रसेन चौक म नवनिर्मित प्रदेस के पांचवां संभाग स्तरीय सी-मार्ट के लोकार्पण करीन । ए अवसर म रायपुर पश्चिम विधायक अउ संसदीय सचिव विकास उपाध्याय, महापौर रायपुर एजाज ढेबर समेत स्व-सहायता समूह के महिला, वन विभाग, नगर निगम के अधिकारी-कर्मचारी, जनप्रतिनिधि अउ आमजन उपस्थित रिहीन।
मुख्यमंत्री भूपेश बघेल ह सी-मार्ट के लोकार्पण के बाद सम्पूर्ण परिसर के भ्रमण करीन अउ छत्तीसगढ़ हर्बल के संगेसंग स्व-सहायता समूह के महिला डहार ले तईयार सामग्री ल देखीन । सी-मार्ट के संचालन करत महिला मन ह मुख्यमंत्री ल उत्पाद के विस्तृत जानकारी दीन । मुख्यमंत्री ह घलो उत्पाद के सराहना करीन अउ किहीन कि प्रदेस के समूह के महिला मन ल सी-मार्ट के रूप म बड़का बाजार मिले हे । सी-मार्ट के माध्यम ले महिला मन ह आर्थिक रूप ले आत्मनिर्भर होए के दिसा म आगू बढ़त हे ।
उल्लेखनीय हे कि ये प्रदेस के पांचवां संभाग स्तरीय सी-मार्ट हे, जेला लगभग 3800 स्क्वायर फ़ीट म 1 करोड़ 23 लाख के लागत ले तईयार करे गेहे । डिपार्टमेंटल स्टोर के तरह ये सी-मार्ट सर्वसुविधायुक्त हे, इंहा लगभग 800 तरह के उत्पाद उपलब्ध हाई, जेमा उत्पादों के संख्या आगू अउ बढ़ेही । सी-मार्ट म छत्तीसगढ़ हर्बल के उत्पाद समेत प्रदेस भर के स्व-सहायता समूह डहार ले तईयार सामग्री एकठन स्थान म मिलही ।
