रायगढ़। बीते रात ट्रेलर म सुते रिहिस एक झन ड्राइवर ल हाथी ह खींच के बाहिर ले गे अउ पटक-पटक के वोला मार डरिस। ये घटना ह छाल घरघोड़ा रोड म बोजिया गांव के आघू मुख्य मार्ग के हरे, जिहां पंचर ट्रेलर ल खड़ा करके ड्राइवर अउ खलासी ह गाड़ी में ही सुते रिहिस।
जानकारी के मुताबिक बीते रात छाल घरघोड़ा रोड म बोजिया गांव के आघू मुख्य मार्ग में एक ठन ट्रेलर ह पंचर होगे ताहन ड्राइवर अउ खलासी ह रात म उंहे सुत गे। इही दउरान हाथी के दल ह आइस अउ गाड़ी के आघू के कांछ ल तोड़ के ड्राइवर सोहेन ल खींच के निकाल लिस अउ थोरकिन दूर म ले जाके पटक-पटक के वोला मार डरिस। उंहे मृतक ड्राइवर के रिश्तेहार खलासी ह भाग के अपन जान बचाईस हे फेर ओखर हाथ अउ गोड़ म चोट आए हे। घटना ह सोमवार के बिहनिया 5 बजे के बतात हे। घटनास्थल म थाना प्रभारी अनिल अग्रवाल ह दल बल के संग पहुंच के मृतक ड्राइवर अउ घायल खलासी ल अस्पताल पहुंचईस हे।
बता देंन कि छाल वनपरीक्षेत्र म हाथी के एक ठन दल ह घूमत हे अउ उंखर मन के आतंक ह रूके के नाम नई लेवत हे। ओखर मन के आतंक ल रोके म वन विभाग ह घलो नाकाम हो गे हे।
