भूपेश के बजट म टिके हे प्रदेस के लोगन मन के नजर

महिला मन कहिन महंगाई कम होवय… त किसान मन कहत हे ‘कर्ज माफी स्थाई हल नोहे’

रायपुर. कांग्रेस सरकार के पहिली बजट 8 फरवरी के विधानसभा म पेस होही। अइसन म लोगन ल भूपेश सरकार ले काफी उम्मीद हे के, ए बेर बजट म उंखर बर कुछु खास होही। देखना हे के उम्मीद मन के अंबार अउ वित्तीय बाध्यता मन के बीच सरकार कइसे बजट लेके आही अउ कइसे सबो झन के उम्मीद पूरा होंही?

प्रदेस म कांग्रेस ह 15 बरिस बाद सत्ता म वापिसी करे हे। सरकार ह सब वर्ग के लोगन ले कतको वादा करे हे। जेमा कुछु ल पूरा घलो कर दे हे। एखर सेती लोगन म भूपेश सरकार ले काफी उम्मीद हे के, ए बेर के बजट म उंखर बर कुछु खास होही।

प्रदेस के मुख्यमंत्री भूपेश बघेल बतौर वित्तमंत्री 8 फरवरी के बजट पेस करे बर जात हे। ए बजट म पूरा प्रदेस के लोगन के नजर टिके हुए हे। हमन सबो वर्ग के लोगन ले बात कर के ए जाने के कोसिस करेन के, बजट ले उमन का उम्मीद रखथे। विपक्ष ह बजट म सिक्षा अउ स्वास्थ्य के क्षेत्र म ध्यान दे के मांग करे हे। संगे-संग किसान मन ल समृद्ध बनाए के घलो मांग बीजेपी ह करे हे। उहें कांग्रेस नेता मन के कहिना हे के, बजट म प्रदेस के जनता ले करे गे वादा मन ल जरूर पूरा करें जाही।

हमन कर्मचारी संघ अउ आम लोगन ले बात करे के जानेन के, उंखर ए बजट ले का उम्मीद हे। महिला मन के कहिना हे के, महंगाई कम होवय। उहें युवामन ह उच्च सिक्षा के क्षेत्र म काम करे अउ रोजगार बढ़ाए के मांग करिन हे।

किसान मन कहिन के …

किसान प्रतिनिधि मन के कहिना हे के, ‘सरकार ह करजा माफी करे हे,  जेखर ले अस्थाइ लाभ मिलिस हे, लेकिन एखर ले किसान मन के स्थाइ रूप ले माली हालत नइ सुधरही। अइसे म  किसान मन  ल लागत मूल्य ले डेढ़ गुना मूल्य देय जाना चाही।

उपलब्ध कराना होही रोजगार के साधन

पत्रकार मन के सरकार के बजट ल लेके  कहिना हे के, ‘बजट म किसान मन उपर जादा फोकस करना होही, लेकिन बजट म अन्य वर्ग के लोगन ल घलो रोजगार के साधन उपलब्ध कराना होंही। काबर के बेरोजगारी के वजह ले लोग पलायन  बर मजबूर हे।’