chhattisgarh म समर्थन मूल्य म किसान मन ले 107 लाख मीट्रिक टन ले जादा धान के होइन खरीदी

जय जोहार । छत्तीसगढ़ (chhattisgarh) म समर्थन मूल्य म धान खरीदी के महाभियान सरलग जारी हे। प्रदेस म समर्थन मूल्य म अब तक 107 लाख मीट्रिक टन ले जादा धान के खरीदी हो गेहे। अब तक राज्य के 23.39 लाख किसान मन ह धान के विक्रय करे हे। धान खरीदी के भुगतान बर मार्क फेड डहार ले अपैक्स बैंक ल 22 हजार करोड़ रुपिया जारी कर दे गेहे । । धान खरीदी के काली 31 जनवरी के आखिरी दिन हे।

ए बछर धान खरीदी के संगेसंग कस्टम मिलिंग बर सरलग धान के उठाव जारी हे । अब तक 107 लाख मीट्रिक टन धान म ले 96 लाख मीट्रिक टन धान के उठाव बर डीओ जारी करे गेहे, जेखर विरूद्ध मिलर्स डहार ले 89 लाख मीट्रिक टन धान के उठाव ल करे जा चुके हे । अधिकारी मन ह बताइन कि 30 जनवरी के 6,905 किसान मन ले 23 हजार मीट्रिक टन धान के खरीदी करे गेहे । आनलाइन प्राप्त टोकन के जरिए किसान मन ले 2 हजार टन धान के घलो खरीदी होए हे।

गौरतलब हे कि ए बछर राज्य म 24.98 लाख किसान मन के पंजीयन होए हे, जेमा ले लगभग 2.32 लाख नवा किसान सामिल हे । ए बछर राज्य म 135 नवा उपार्जन केन्द्र सुरू करे गेहे, राज्य म धान खरीदी बर 2617 उपार्जन केन्द्र बनाए गेहे । सामान्य धान 2040 रुपिया प्रति क्विंटल अउ ग्रेड-ए धान 2060 रुपिया प्रति क्विंटल की दर ले खरीदे जात हे ।