जिला मन के प्रभारी मंत्री तय…अउपचारिक ऐलान जल्द

एक मंत्री ल छोड़ के सबो झन के तीर दू या तीन जिला के प्रभार

रायपुर। भूपेश सरकार  ह जल्द सबो जिला मन के प्रभारी मंत्री के घोसना करइया हे।मुख्यमंत्री भूपेश बघेल ह जिला के प्रभारी मंत्री के नाम तय कर दे हे।

जिला के प्रभारी मंत्री मन के नाम के अउपचारिक ऐलान जल्द हो सकत हे। एक मंत्री ल छोड़के लगभग सबो झन के तीर दू-तीन ले जादा जिला के प्रभारी मंत्री बनाय गे हे। सरकार ह जल्द ही ए संबंध म आदेस जारी करही।

सूत्र मन ले मिले जानकारी म मंत्री ताम्रध्वज साहू ल दुर्ग अउ बेमेतरा, मंत्री रविन्द्र चौबे ल बिलासपुर अउ मुंगेली, मंत्री टीएस सिंहदेव ल सरगुजा, सुरजपुर अउ बलरामपुर के प्रभारी मंत्री बनाय गेहे। एखर संगे-संग  मंत्री उमेश पटेल ल रायगढ़ अउ जशपुर, मंत्री जयसिंह अग्रवाल ल कोरबा अउ कोरिया, मंत्री शिव डहरिया ल रायपुर अउ बलौदाबाजार, मंत्री अनिला भेड़िया ल कांकेर अउ बालोद, मंत्री रुद्र गुरु ल धमतरी, गरियाबंद अउ महासमुंद के प्रभार दिए जात हे।

आदिवासी नेता व मंत्री कवासी लखमा ल बस्तर संभाग के सबो जिला (कांकेर ल छोड़ के) के प्रभार देय जात हे। एमा बस्तर, कोंडागांव, नारायणपुर, बीजापुर, दंतेवाड़ा अउ सुकमा जिला सामिल हे। एखर संग  ही मंत्री मो. अकबर कवर्धा अउ राजनांदगांव अउ प्रेमसाय सिंह टेकाम ल केवल एक ठन जांजगीर-चांपा जिला के प्रभारी मंत्री बनाय गेहे।