chhattisgarh म 1000 परिवहन सुविधा केन्द्र ल खोले के प्रक्रिया होगे सुरू, मुख्यमंत्री ह करे रिहीस घोसना

जय जोहार। छत्तीसगढ़ (chhattisgarh) म परिवहन संबंधी सेवा ल आसान अउ घर के निकट उपलब्ध कराय बर मुख्यमंत्री भूपेश बघेल ह राज्यभर म परिवहन सुविधा केन्द्र के स्थापना के घोसना करे रिहीस । ओखर घोसना के बाद विभाग ह एखर प्रारूप ल तैयार करीन अउ अधिसूचना के बाद अब परिवहन सुविधा केन्द्र के स्थापना घलो सुरू हो गेहे ।

जिला स्तर म इच्छुक मनखे मन ले आवेदन ल मंगाए जात हे । एखर तहत राजनांदगांव जिला म 24 परिवहन केन्द्र के स्थापना बर इच्छुक आवेदक ले अवइया 10 मई तक आवेदन ल आमंत्रित करे गेहे । (chhattisgarh) गौरतलब हे कि पूरा राज्य भर म 1000 के करीबन परिवहन सुविधा केन्द्र के स्थापना ल करे जाही । ए सुविधा के बाद परिवहन संबंधी सुविधा बर मनखे मन ल अनाधिकृत एजेंट के चक्कर लगाय के जरूरत नई होही ।

परिवहन संबंधी सेवा म विस्तार बर राज्य भर म परिवहन सुविधा केन्द्र के स्थापना ल लेके मुख्यमंत्री भूपेश बघेल ह बीते 26 जनवरी के घोसना करे रिहीस । परिवहन सुविधा केन्द्र की स्थापना अउ भूमिका ल लेके परिवहन विभाग डहार ले प्रारूप तैयार कर स्थापना के प्रक्रिया ल सुरू कर दे गेहे । ए केन्द्र के स्थापना के बाद परिवहन सुविधा बर मनखे मन के पहुंच आसान हो जाही ।