लोक निर्माण विभाग सचिव ह करिन केशकाल घाट बायपास के निरीक्षण, काम ला तुरते सुरू करे के दिस निर्देस

308 करोड़ के लागत ले 11.38 किमी लंबा फोरलेन बायपास बनही

रायपुर. लोक निर्माण विभाग के सचिव मुकेश कुमार बंसल ह आज रायपुर-जगदलपुर रद्दा म बहुप्रतीक्षित केशकाल घाट फोरलेन बायपास के निरीक्षण करिन। उमन बिभागीय अधिकारी अउ निर्माण एजेंसी के संग बायपास के दूनों छोर मन के जायजा लिन। उमन बायपास के बुता ला तुरते सुरू करे के निर्देस दिस। ए मौका म लोक निर्माण विभाग के प्रमुख अभियंता वी.के. भतपहरी घलो मौजूद रहिन।

श्री बंसल ह बायपास रद्दा म बचे पेड़ मन ला ततपरता ले कटे बर वन मंडलाधिकारी ला निर्देस दे हें। उमन बायपास ले जुड़े मुआवजा मामला मन के जानकारी ले के लंबित मामला मन के निराकरण यथासीघ्र करे के निर्देस दिस। उमन कहिन कि बस्तर अउ छत्तीसगढ़ बर ए बायपास बहुत महत्वपूर्ण हे। एखर तेजी ले निर्माण करके आवत-जावत सुरू करना सरकार के प्राथमिकता म हे।

2 वृहद अउ 2 मध्यम पुल घलो बनही

लोक निर्माण विभाग डहर ले 308 करोड़ रूपिया के लागत ले 11.38 किमी लंबा केशकाल घाट बायपास के निर्माण करे जात हे। ए बायपास म दू ठन वृहद अउ दू ठन मध्यम पुल घलो बनाए जाही।