लोक निर्माण विभाग के सचिव ह सड़क के बुता ला देखिन
- अधिकारी मन के बैठक लेके बुता में तेजी लाय के दीन निर्देश, कहिन- गुणवत्ता अउ समय-सीमा में बुता पूरा करना पहिली प्राथमिकता
रायपुर. लोक निर्माण विभाग के सचिव मुकेश कुमार बंसल ह आज बिलासपुर म नेहरू चौक ले दर्रीघाट तक बनत 10 किलोमीटर के फोरलेन सड़क के बुता के निरिक्षण करिन। ओमन मउका म मौजूद बड़े विभागीय अधिकारी अउ ठेकेदार मन ला बुता म तेजी लाके ओला पूरा करे के निर्देश दीन। ओमन अधिकारी मन के बैठक लेके बिलासपुर जिला म जरूरी सड़क अउ भवन मन के निर्माण के बुता कतका आगू बढ़े हे ,ओखरो समीक्षा करिन।
लोक निर्माण विभाग के सचिव ह बिलासपुर परिक्षेत्र के मुख्य अभियंता, अधीक्षण अभियंता, कार्यपालन अभियंता अउ अनुविभागीय अधिकारी मन ले कहिन कि हर बुता के अलग-अलग चरण बर समय तय करके काम ला तेजी से बढ़ाव। बुता के रोज देख-रेख करव अउ ठेकेदार मन संग तालमेल बनाके समय-सीमा म काम पूरा कराव। ओमन टेंडर (निविदा) पास होय के एक महिना के भीतर कइसनो करके बुता सुरु कराए के निर्देश दीन। बिलासपुर के कलेक्टर संजय अग्रवाल, जिला पंचायत के सीईओ संदीप अग्रवाल, लोक निर्माण विभाग के प्रमुख अभियंता वी.के. भतपहरी, मुख्य अभियंता आर.के. रात्रे अउ अधीक्षण अभियंता के.पी. संत घलो ए बैठक में मौजूद रहिन।
श्री बंसल ह कहिन कि विभाग के बुता मन म गुणवत्ता अउ समय-सीमा तय करना सबले पहिली प्राथमिकता (सर्वोच्च प्राथमिकता) आय। ओमन बैठक म कोनी-मोपका बायपास, जयरामनगर रेलवे ओवरब्रिज, जयरामनगर-सीपत रोड बायपास, हाई कोर्ट म ऑडिटोरियम, नवा जेल भवन अउ बोदरी म अदालती मामला मन के ओआईसी बर बनइया विश्राम भवन के बुता के तेजी ला घलो परखिन। ओमन नेशनल हाईवे (राष्ट्रीय राजमार्ग) के बुता मन के घलो जानकारी लीन।
विभागीय सचिव ह नेहरू चौक ले दर्रीघाट सड़क के निरीक्षण के बखत अधिकारी मन ला सड़क मन ला साफ, सुंदर अउ सुव्यवस्थित रखे के निर्देश दीन। ओमन डिवाइडर मन के दिवार अउ ग्रिल मन म रंग-रोगन (पेंट) कराए बर घलो कहिन।
हमर चैनल ला सब्सक्राइब करव अऊ मया देवव
Whatsapp – https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook – https://www.facebook.com/share/18GsFBTgfd/
