आवारा कुकुर मन के मुंह अउ गोड़ ल बांधके बेरहमी ले पीटिस, पशु प्रेमी मन करिन थाना म शिकायत

बिलासपुर। चकरभाठा थाना इलाका म रामावेली के रहैय्या मन ह दर्जनभर ले जादा कुकुर मन ल पकड के ओखर मुंह अउ गोड़ ल बांध के बेरहमी ले पिटाई करिस, ताहन अधमरा हालत म फेंक दिस। शहर के पशु-पक्षी प्रेमी मन के शिकायत म पुलिस ह मामला के जांच म जुटिन हे।

जानकारी के मुताबिक रामावेली कॉलोनी म आवारा कुकुर मन ले उंहा के रहैय्या मन ह बहुत परेशान रिहिस। कुछ दिन पहिली कलोनीवासी मन ह मिलके आसपास के दर्जनभर ले जादा कुकुर मन ल पकड़ के ओखर मुंह अउ गोड़ ल बांध के डंडेच-डंडा पीटिस हे अउ अधमरा करके फेंक दिस। जेकर शिकायत एनीमल लवर्स एक्ट सोसायटी के पदाधिकारी अउ सदस्य मन ह गुरूवार के चकरभाठा थाना म करिन हे।