खास खबर……बदलत हे माओवादी मन के सुर……भूपेश ल मदद बर  लिखे हे खत

जगदलपुर। छत्तीसगढ़ म 15 साल बाद सत्ता बदले हे। सरकार बदले के बाद अब माओवादी मन के सुर घलो बदलत हे।  तीन दसक ले जादा बेरा ले प्रदेस म हिंसात्मक घटना मन ल  अंजाम देवइया माओवादी अब विकास के बात करे के दावा करत हे। एखर बर माओवादी मन  ह  एक कथित प्रेस विज्ञप्ति जारी करिन हे। ए विज्ञप्ति म आदिवासी क्षेत्र मन म विकास के गुहार सरकार ले लगाइस हे। उहें ए मामला म बीजापुर एसपी मोहित गर्ग के कहिना हे के माओवादी अपन मांग मन ल पूरा करवाना चाहत हे, त पहिली उमन आत्मसमर्पन करय।

सरकार बदलत ही माओवादी के घलोक सुर बदले लगे हे। पामेड़ एरिया के एक माओवादी कमेटी ह एक 17 सूत्रीय पर्चा जारी कर के सरकार ले पिछड़ा इलाका मन के विकास के मांग करिस हे।  पर्चा के सत्यता जाने बर पुलिस एखर जाँच करत हवय।

पर्चा म माओवादी मन ह सरकार ले अपन आधार इलाका म आश्रम, अस्पताल अउ स्कूल के संग शिक्षक मन अउ डॉक्टर मन के नियुक्ति के मांग करिस हे। संग ही युक्तिकरन के तहत राज्य भर म बंद करेगे 3000 स्कूल ल फेर ले चालू करे के गुहार सरकार ले लगाए हे। एखर अलावा स्कूल-कॉलेज मन म  विसयवार शिक्षक मन के नियुक्ति के मांग घलो उठाए हे।

मामला म बीजापुर एसपी मोहित गर्ग ह बताइस के –‘अइसन पहिली बेर होइस हे के माओवादी मन ह  पेन ले लिखके पर्चा जारी करिस हे।  एखर सेती ए बात के पुष्टि नइ करे जा सकय कि ए पर्चा माओवादी मन ह  देय हे। माओवादी अपन मांग पूरा करवाना चाहत हे, त पहिली उमन आत्मसमर्पन करय।’