एक ठन अइसन चौपाल जँहा खुसी अउ ताली के गूँज रतिस
- लखपति दीदी के हौसला के उड़ान देख के मुख्यमंत्री विष्णु देव साय गदगद हो गेइन, सबो झन ला अउ मेहनत करके अब करोड़पति बने के डाहर चले बर कहिन।
- मेधावी लइका ला मुख्यमंत्री के असीस अउ प्रोत्साहन मिलिस।
- बैगा बाहुल्य कमारखोल में आमा पेड़ के खाले मुख्यमंत्री ह लगाइन चौपाल।
- गाँव वाले के माँग ऊपर सामुदायिक भवन, कमारखोल में रामखिलावन के घर ले देवसरा तक छय किलोमीटर माटी-मुरुम सड़क, मुक्तिधाम शेड अउ महतारी सदन के घोषणा करिन।
रायपुर . मई के तपती घाम में आज लगातार दूसर दिन मुख्यमंत्री विष्णु देव साय दुरिहा गाँव के अचानक दौरा में रहिन। कबीरधाम जिला के पंडरिया स्थित लोखान पंचायत में आज मुख्यमंत्री के आगमन होइस। ए मौका में ओमन बैगा बाहुल्य कमारखोल में पीएम जनमन योजना के तहत होय काम के निरीक्षण करिन अउ ओही मेर आमा पेड़ के खाले अपन चौपाल लगा लेइन। अपन बीच में मुख्यमंत्री ला देख के गाँव वाले के भीड़ जुर गिस। बीरनमाला अउ कमल के फूल ले मुख्यमंत्री के मयारू सुवागत करत गाँव वाले के चेहरा खिल उठिस।
ए दौरान महतारी सकति ला आगू में बइठे देख के मुख्यमंत्री ह पूछिन कि— “कतका महतारी मन इहाँ लखपति हो गे हव?” एक साथ कतको हाथ हवा में उठ गेइन। मुख्यमंत्री ह खुसी जतावत सबो ला करोड़पति बने कोती आगू बढ़े बर कहिन। ओमन बारी-बारी ले लखपति दीदी ले गोठ-बात करिन। इहाँ जंगल ले बीन के लाए महुआ अउ चार ला मुख्यमंत्री श्री साय ला भेंट देवत कुकदूर के लखपति दीदी कचरा तेलगाम ह मुख्यमंत्री ले कहिस कि— “महुआ के पौष्टिक लड्डू बना के खइहू, नई तो मैं बना के दूँहूँ।” मुख्यमंत्री घलो ओकर मया ला देख के भाव-बिभोर होगे अउ मुसकुरावत बोलिन कि— “घर जाके बनवा के खाहूँ।”
कचरा तेलगाम दीदी तीर-तखार के गाँव में बनत प्रधानमंत्री आवास में सेंट्रिग प्लेट लगाथे अउ एखर ले ओला एक साल में 80 हजार के आय होय हे। ओमन कहिन कि आज चौपाल लगे देख के ओमन साहस करके उहाँ पहुँचिन अउ मुख्यमंत्री बर भेंट के रूप में जंगल ले बीने महुआ अउ चार दीन। ओही मेर डीलर दीदी रजमत बाई धुर्वे ह बताइन कि ओमन प्रधानमंत्री आवास बर मटेरियल सप्लाई के काम करथे। ओला सालाना 2.50 ले 3 लाख के मुनाफा होय हे। लखपति पशु सखी शिवरानी पटेल के कहना हे कि समूह ले जुड़ के सीआईएफ ले ओमन बउपार बर रिन (कर्जा) लीन अउ अपन खेत में साक-भाजी लगाइन। ओला सालाना डेढ़ लाख के आय होवत हे। ए बिहान योजना ले जीवन में आय सुग्घर बदलाव बर धनवाद देवत ओमन अपन खेत के भाजी-पाला टोकरी में भर के मुख्यमंत्री ला भेंट करिन। मुख्यमंत्री घलो सबो दीदी ले गोठिया के प्रोत्साहित करिन कि— “अइसने मन लगा के काम करव अउ आर्थिक रूप ले मजबूत बनव।” बता दन कि लोखान पंचायत में 58 लखपति दीदी हें जेमन अलग-अलग बउपार ले जुड़ के आर्थिक रूप ले मजबूत होवत हें।
चौपाल में होइस नामकरन
आज अपन ननहा लइका के संग ऋषि बघेल घलो चौपाल पहुँचीन। इहाँ ओमन मुख्यमंत्री ले एक ही गोहार लगाइन कि ओकर लइका के नामकरन कर दंय। लइका ला गोद में लेके दुलारत मुख्यमंत्री श्री साय ह पूछिन कि— “एकर जनम कब होय हे?” तब महतारी ह बताइन कि अइतवार (रविवार) के दिन। मुख्यमंत्री ह लइका ला मया ले देखत ओकर नाम रविशंकर बघेल रखिन अउ असीस के रूप में 500 रूपिया घलो दीन। पंडरिया विधायक भावना बोहरा ह घलो लइका ला 500 रूपिया असीस के रूप में दीन। मुख्यमंत्री कोती ले लइका के नाम रखत ही चौपाल में ताली गूँज उठिस।
चौपाल में पहुँचीन मेधावी लइका
आज कबीरधाम के पंडरिया के लोखान पंचायत के आश्रित गाँव कमराखोल में मुख्यमंत्री विष्णु देव साय के चौपाल ला देख के उहाँ ले निकलत राजेंद्र मसराम अउ ओकर ददा घलो रुक गेइन। ए दौरान गोठ-बात में पता चलिस कि छिरहा के रहइया ए मेधावी लइका ह ए साल हाई स्कूल में 94.5% नंबर के संग जिला में नौवाँ स्थान पाए हे। मुख्यमंत्री ह खुस होके ओला पेन दीन अउ पूछिन कि— “बड़े होके का बनना चाहत हव?” एखर ऊपर ओ ह बड़े होके आईएएस (IAS) बने के सपना ला बताइस। मुख्यमंत्री ह ओला बहुत सारी सुभकामना दीन ताकि ओ ह अपन सपना ला पूरा कर सकय। इहाँ कमराखोल के बैगा बस्ती के कक्षा नवमी के एक झन लइकी घलो चौपाल में मुख्यमंत्री ले मिलिस अउ बताइस कि आज पीएम जनमन ले बने ओकर आवास में मुख्यमंत्री पहुँचे रहिन। उहाँ बात नई हो पाए रहिस एखर सेती ओ ह चौपाल में पहुँचीन। ए साल ए लइकी हेम कुमारी ह कक्षा नवमी में 75% नंबर लाइस। मुख्यमंत्री ह ओला आगे घलो मन लगा के पढ़े के सलाह अउ बधाई देवत पेन दीन।
बैगा बाहुल्य गाँव कमराखोल में घोषणा
मुख्यमंत्री विष्णु देव साय ह आज चौपाल लगा के सरकारी योजना के काम-काज के जानकारी लीन अउ खुस दिखिन कि दुरिहा इलाका तक हितग्राही ला सासन के योजना के लाभ मिलत हे। ओमन गाँव वाले के माँग ऊपर कमरखोल में मिशन तालाब गहरीकरण (ट्यूबवेल के संग), रामखिलावन के घर ले ग्राम देवसरा तक माटी-मुरुम सड़क (लगभग 6 किलोमीटर), सामुदायिक भवन, मुक्तिधाम शेड निर्माण अउ महतारी सदन (स्व सहायता समूह के महतारी मन के माँग ऊपर) के घोषणा करिन। ए मौका में मुख्यमंत्री के प्रमुख सचिव सुबोध कुमार, बिसेस सचिव रजत बंसल, कलेक्टर गोपाल वर्मा, एसपी श्री धर्मेंद्र सिंह, जिला पंचायत सीईओ अभिषेक अग्रवाल अउ गाँव वाले चौपाल में उपस्थित रहिन।
