छत्तीसगढ़ विधानसभाः ए मुद्दा मन म गरमाइस सदन

रायपुर: छत्तीसगढ़ विधानसभा म बजट सत्र के सातवां दिन विपक्ष ह जमके हंगामा करिस. सदन म बिजली बिल माफ करे, कानन पेंडारी जू म सफेद बाघ के मउत और पेड़ मन के कटाई के मुद्दा ल लेके विपक्ष व सत्तापक्ष के विधायक मन सरकार ल घेरे के कोशिश करिन।

छत्तीसगढ़ विधानसभा म कानन पेंडारी जू म वन्य प्राणी मन के  संदिग्ध मउत के मामला गूंजिस. जेसीसीजे विधायक अजीत जोगी ह मामला ल सदन म उठाइस. उमन कहिन,  ‘सफेद बाघ के मृत्यु होय रहिस हे.

कहे गेहे के  सर्प के काटे ले  मृत्यु होइस. जे दुखद हवय’. उमन कहिन , ‘शेर के मउत ले साफ हे के एनक्लोजर मापदंड के अनुसार नइ बने हे. यदि बने होतिस तो सांप एनक्लोजर म नइ घुस सकतिस’.

जोगी के सवाल म वन मंत्री मो. अकबर ह कहिन, ’28 एनक्लोजर मापदंड के अनुसार हे जबके 37 मापदंड के मुताबिक नइए. सफेद शेर के एनक्लोजर ह 3 बाई 3 के बना दे गेहे’.

वन मंत्री ह ए मामला म दोषी व्यक्ति म उपर कार्रवाई करे के आश्वासन दिस.  उमन कहिन, ए मामला म दोषी व्यक्ति ल दंडित करे जाही.एखर संगेच  बिजली बिल के मुद्दा घलो गूंजिस.

नेता प्रतिपक्ष धरमलाल कौशिक ह सदन म बिजली बिल हाफ करे के मुद्दा उठाइस. कौशिक के सवाल के जवाब म मुख्यमंत्री भूपेश बघेल  कहिन, ‘जे वक्त ए प्रश्न लगे रहिस हे, तब योजना लागू नइ होय रहिस हे. अब ए योजना ल लागू करे जा चुके हे.

घरेलू उपभोक्ता म ल 400 यूनिट तक के बिजली बिल म छूट दे जात हे. एक अप्रैल ले बिल आही, वो आधा आही. जेखर फायदा 45 लाख 91 हजार 30 बीपीएल परिवार मन  समेत घरेलू उपभोक्ता मन ल घलो मिलही’.

बिजली बिल म गरमाइस सदन

सरकार के जवाब ले असंतुष्ट बीजेपी विधायक शिवरतन शर्मा ह कहिन के, ‘कांग्रेस ह जनघोषना पत्र म बिजली बिल हाफ करे के घोसना करे रहिस हे. लेकिन ओला अब 400 यूनिट के आंकड़ा म  बांधत हे, जे ह  छत्तीसगढ़ के जनता ले धोखा हे. शिवरतन शर्मा ह पूछिस, ‘ का सरकार पूरा बिजली के बिल ल माफ करही.