Corona : छत्तीसगढ़ म फेर मिलिस कोरोना के तीन नवा मरीज, सक्रिय मरीज मन के संख्या फेर होइस 89

जय जोहार…. छत्तीसगढ़ म कोरोना (corona) वायरस के संक्रमण ह तेजी ले बाढ़त हे। प्रदेश म फेर तीन नवा पाजिटिव मरीज मिले हे। अब कोरोना ह बलरामपुर जिला म घलो दस्तक दे दे हे। कांकेर, बिलासपुर अऊ बलरामपुर म एक-एक मरीज मिले के राज्य कोरोना कंट्रोल डेस्क ह पुष्टि करे हे। एखर मन के हास्पिटल म भर्ती प्रक्रिया ह जारी हे। प्रदेश म फेर सक्रिय मरीज मन के संख्या ह बाढ़ के 89 हो गे हे।

कुछु देर पहिले जांजगीर जिला के तीन कोरोना (corona) संक्रमित मरीज ह स्वस्थ हो के डिस्चार्ज होय रहिस। जेखर ले लोगन मन ल थोड़कीन खुशी जरूर मिलिस, लेकिन अब फेर तीन कोरोना संक्रमित मरीज मिले हे। स्वास्थ्य विभाग के टीम ह मरीज मन ल हॉस्पिटल म भर्ती करवाय के प्रक्रिया म जुटे हुये हे।

बता देन कि राज्य म कोरोना (corona) संक्रमित मरीज मन के संख्या ह बाढ़ के 151 हो गे हे। जेमा ले 62 मरीज ह स्वस्थ हो गे हे। जबकि सक्रिय मरीज मन के संख्या ह फेर बाढ़ के 89 हो गे हे।