Raipur म काली ले सुरु होही तीन दिन के राष्ट्रीय संगोष्ठी, 10 राज्य के 25 रिसोर्स पर्सन ह देही व्याख्यान
जय जोहार । (Raipur) पंडित रविशंकर विश्वविद्यालय के इतिहास अध्ययन शाला म 17 मार्च ले 19 मार्च तक राष्ट्रीय संगोष्ठी के आयोजन करे गेहे। ए संगोष्ठी म राष्ट्रीय आंदोलन के विभिन्न धारा सुभाष चंद्र बोस अउ आजाद हिन्द फौज के विशेष संदर्भ म विषय म 10 राज्य के 25 रिसोर्स पर्सन ह अपन व्याख्यान देही अउ 85 शोध पत्र पढ़े जाही।
ए संगोष्ठी के सुभारंभ 17 मार्च के बिहनिया 11.30 बजे इंदिरा गांधी राष्ट्रीय मुक्त विश्वविद्यालय नई दिल्ली के पूर्व कुलपति प्रोफेसर रविन्द्र कुमार के मुख्य आतिथ्य अउ पंडित रविशंकर विश्वविद्यालय रायपुर के कुलपति प्रोफेसर केशरी लाल वर्मा के अध्यक्षता म करे जाही । विशेष अतिथि के रूप म छत्तीसगढ़ के तकनीकी शिक्षा संचालक अवनीशरण अउ अध्यक्ष इतिहास विभाग मगध विश्वविद्यालय बोधगया प्रोफेसर मुकेश कुमार ह आधार वक्तव्य प्रस्तुत करही।
ए राष्ट्रीय संगोष्ठी के संयोजक अउ पंडित रविशंकर विश्वविद्यालय इतिहास अध्ययन शाला के वरिष्ठ सहायक प्राध्यापक डॉ. डिश्वर नाथ खुंटे ह बताइन कि वर्तमान म पूरा देस भर म आजादी के अमृत महोत्सव मनाए जावत हे । ए कड़ी म नेताजी सुभाष चंद्र बोस के राष्ट्रीय आंदोलन म योगदान अउ आजाद हिन्द फौज के उत्कृष्ट काम ल देस के समक्ष लाए के काम करे जावत हे । संगोष्ठी के पहिला दिन दू ठन तकनीकी सत्र होही। 18 मार्च के चार ठन अउ 19 मार्च के दू ठन तकनीकी सत्र आयोजित करे जाही ।
