बड़ नक्सली लीडर के कैम्प ल धवस्त करिन जवान मन

बीजापुर । नक्सली मन के शहीदी सप्ताह म जवान मन ह उंखर कैंप अउ स्मारक ल ध्वस्त करे म बड़ कामयाबी हासिल करिस हे। ये दउरान जवान मन ल कैंप ले भारी मात्रा म विस्फोटक अउ नक्सल सामाग्री घलो बरामद करिस हे। जवान मन के कहिना हे ध्वस्त करे गे कैंप ल देखके अइसे लगत रहिस हे के ये ह कोनो बड़ लीडर के कैंप रहिस हे अउ येमा कैडर मन ल हथियार अउ आईईडी बनाय के प्रसिक्छन देय जात रहिस हे।
मिले जानकारी के अनुसार बीजापुर पुलिस के जवान मन के टीम नेशनल पार्क इलाका के गांव मद्देड़, भोपालपट्टनम, फरसेगढ़ अउ तोयनार के ओर सर्चिंग बर निकले रहिस हे। ये दउरान जवान मन ह जंगल म नक्सली कैंप अउ मारे गे बड़ नक्सली लीडर मन के स्मारक ल ध्वस्त कर दिस। जवान मन ह कैंप ले भारी मात्रा म विस्फोटक, डेटोनेटर, कार्डेक्स वायर अउ अन्य सामान के संग ही लेथ मशीन व ड्रिल मशीन घलो बरामद करिन , जेकर उपयोग भरमार बनाय बर करे जात रहिस हे।