चंदूलाल चंद्राकर के जयंती, मुख्यमंत्री विष्णु देव साय ह करिन नमन
रायपुर। छत्तीसगढ़ के मुख्यमंत्री विष्णु देव साय ह पत्रकारिता के पुरोधा चन्दूलाल चन्द्राकर के जयंती म ओला नमन करिन। मुख्यमंत्री साय ह छत्तीसगढ़ म ओखर मन के योगदान ल याद करत हुए कहिस कि ओ हा निर्भीक पत्रकारिता करत अपनी लेखन ले कई ज्वलंत मुद्दा ल उठाइन हे। ओहा कई महत्वपूर्ण विभाग मन के मंत्री के दायित्व संभालत घलो देश के सेवा करिन। संग म किहीस कि चंदूलाल चंद्राकर जी के निष्पक्ष अउ मूल्य आधारित पत्रकारिता नवा पीढ़ी बर प्रेरणास्रोत बने रही।
बता दन कि चंदूलाल चंद्राकर के जन्म 1 जनवरी 1920 म दुर्ग जिला के निपानी गांव म होय रीहिन। ओ हा एक भारतीय पत्रकार अउ राजनीतिज्ञ रीहिन हे, जेन ह मध्य प्रदेश राज्य के दुर्ग लोकसभा के प्रतिनिधित्व करत, 10वां लोकसभा के सदस्य रीहिन। चंदूलाल चंद्राकर ह 25 साल के उम्र म यानी कि साल 1945 ले ही सक्रिय रूप ले पत्रकारिता ले जुड़ गे रीहिन। ओहा दूसर विश्व युद्ध के समय घलो अभ्यस्त पत्रकार मन जइसन पत्रकारिता करे लगिस।
उहें पत्रकारिता के बाद चंदूलाल चंद्राकर ह सक्रिय राजनीति म अपने कदम आगे बढ़ाइन। ओहा पहिली बार साल 1970 म लोकसभा बर निर्वाचित होके राजनीति म एंट्री करिन। अउ साल 1970 ले लेके 1991 तक दुर्ग लोकसभा सीट ले 5 बार चुने गिस। साल 1980 ले 1982 तक चंदूलाल चंद्राकर ह पर्यटन अउ नागरिक उड्डयन केंद्रीय राज्यमंत्री रीहिन हे। संग म 1982 म अखिल भारतीय कांग्रेस कमेटी के महासचिव घलो बनाए गिस। बाद म वो फेर साल 1985 ले 1986 तक केंद्रीय कृषि अउ ग्रामीण राज्य विकास राज्य मंत्री बनिस। चंदूलाल चंद्राकर ह अखिल भारतीय कांग्रेस कमेटी बर प्रवक्ता के रूप म घलो काम करिन हे। संग म 1994 ले 1995 तक छत्तीसगढ़ राज्य निर्माण मंडल के अध्यक्ष के रूप म घलो अपन भूमिका निभाइस।
