रायगढ़. रायगढ़ ले करीब 15 किमी दूर गेरवानी के डीडापारा में रविवार के संझा आकाशीय बिजली माने गाज गिरे ले पिता-पुत्र के मौत होगे अउ एक ग्रामीण घायल होगे। बारिश के दौरान ये पिता-पुत्र दूनों झन घर के बाहिर पेड़ के आड़ ले के बइठे रिहिन हें। उंखर संग परोसी ह घलो बइठे रिहिस हे। गाज गिरे ले तीनों झन घायल हो गें। उंखर इलाज रायगढ़ मेडिकल कॉलेज अस्पताल में चलत रिहिस हे, जेमा पिता-पुत्र दूनों झन रात करीब 9 बजे दम तोड़ दिन।
जानकारी के अनुसार रविवार संझा गेरवानी डीपापारा निवासी नरेंद्र रात्रे ह अपन 8 साल के बेटा किशन रात्रे और परोसी कन्हैया बघेल के संग घर के बाहिर पेड़ के आड़ में बइठे रिहिस हे। इही बेरा बारिश होए लागिस, बिजली कड़किस तभो ले ओमन नइ उठिन। इही दौरान उनकर ऊपर गाज गिरगे। ये घटना में तीनों गंभीर रूप ले घायल होगे। आसपास के लोगन मन डायल 112 ल खबर करिन। खबर पाके तीनों झन ल इलाज बर रायगढ़ अस्पताल में भर्ती कराए गिस। संझाती बेरा इलाज के दौरान पिता-पुत्र के मौत होगे। उहें घायल युवक के स्थिति अभी भी गंभीर बने हुए हे। पुलिस ह मर्ग दर्ज करे हे।
