साधु के भेस म अईस दू झन ठग, एक परिवार ल दिस भसम करे के धमकी, ले गे रूपिया अउ गाड़ी

गरियाबंद। गरियाबंद जिला के एक ठन गांव म साधू के भेस म आए दू झन ठग मन ह एक परिवार के सदस्य मन ल भसम कर दूहूं किहिक धमकी देके 7000 रूपिया अउ मोटरसाइकिल ल लूट के भाग गे। ये मामला ह राजिम थाना इलाका के रावड़ गांव के हरे।

जानकारी के मुताबिक रावड़ गांव म नागा साधु के भेस म दू झन गोपाल घृतलहरे के घर पहुंच गे अउ वो मन ल जादू  देखा के भ्रमित कर दिस। तेकर बाद साधु मन ह तंत्र-मंत्र ले वो मन ल भसम कर दूहूं कहिक धमकी देवत रूपिया के मांग करिस। डर के मारे गोपाल ह लगभग 7000 रूपिया ल दे दिस। तेकर बाद वो मन ह पास के ही गांव परसदा जोशी जाए बर उंखर मोटरसाइकिल ल मांगिस, त वो ह खुद उहां तक छोड़ दूहूं कहिस। जब गोपाल ह मोटरसाइकिल म वो साधु मन ल बइठा के लेगत रिहिस त आधा रस्ता म ओला डरा धमका के मोटरसाइकिल ले उतार दिस अउ 5 मिनट म आवत हन कहिक मोटरसाइकिल ल लेके भाग गे। गोपाल ह ये घटना के रिपोर्ट राजिम थाना म दर्ज कराए हे। पुलिस ह दूनों ठग के तलाश म जुटिन हे।