केंद्रीय गृहमंत्री अमित शाह ह अमर वाटिका में शहीद मनला दिहिन श्रद्धांजलि, परिवार के मनखे मन ले करिन मयारू मुलाकात
- बस्तर के सांति, सुरक्षा अउ विकास बर अपन जान के सबले बड़े बलिदान देवइया बीर जवान मनला करिन नमन’
- शहीद जवान के परिवार के बीच बइठके केंद्रीय गृहमंत्री ह बंधाइस ढांढस, सब्बो किसम के मदद के दियिस भरोसा
- मुख्यमंत्री विष्णु देव साय ह जवान मन के भारी साहस ला करिस नमन
रायपुर. केंद्रीय गृह अउ सहकारिता मंत्री अमित शाह ह अपन बस्तर दौरा के बखत आज जगदलपुर में बने अमर वाटिका पहुंचिन अउ माओवाद के खिलाफ लड़ाई में अपन जान के सबले बड़े बलिदान देवइया एक हजार ले जादा अमर शहीद जवान मनला श्रद्धांजलि अरपित करिन। ए मउका में मुख्यमंत्री विष्णु देव साय घलो उपस्थित रहिन।
केंद्रीय गृहमंत्री अमित शाह ह कहिन कि बस्तर के भुइँया में सांति, सुरक्षा अउ विकास लाय बर हमर जवान के बलिदान ला कभू भुलाय नहीं जा सके। ओमन कहिन कि देस के सुरक्षा बर अपन जान देवइया बीर जवान के त्याग ह कभू बेकार नहीं जाही। ओमन साफ कहिन कि केंद्र अउ राज्य सरकार ह बस्तर में हमेसा बर सांति बनाय, विकास ला आखिरी मनखे तक पहुंचाय अउ माओवाद ला जड़ ले मिटाय बर पूरा संकल्प के संग काम करत हे।
एकर बीच, केंद्रीय गृह मंत्री अमित शाह ह बीजापुर नक्सली हमला में शहीद हुए जवान कालेन्द्र प्रसाद नायक अउ पवन कुमार मंडावी के परिवार के मनखे मन ले बड़ मया के संग मुलाकात करिन। ओमन परिवार वाले के बीच बइठके ओकर दुख ला बांटिन, ढांढस बंधाइन अउ सरकार कोति ले जतका हो सके सहायता करे के भरोसा दिलवाईन। केंद्रीय गृहमंत्री अमित शाह ह सुरक्षाबल के जवान ले घलो गोठबात करके ओकर उत्साह बढ़ाइन अउ ओकर साहस अउ समरपन के तारीफ करिन।
मुख्यमंत्री विष्णु देव साय ह कहिन कि शहीद जवान के बलिदान ला छत्तीसगढ़ ह कभू नहीं भूले। ओमन कहिन कि राज्य सरकार ह शहीद परिवार के सम्मान, सुरक्षा अउ भलाई बर पूरा संवेदनशीलता के संग काम करत हे। मुख्यमंत्री श्री साय ह कहिन कि बस्तर अब सांति, बिसवास अउ विकास के नवा रस्ता में आगू बढ़ात हे अउ एमा सुरक्षाबल के भारी योगदान हे।
ए मउका में उपमुख्यमंत्री अउ गृह मंत्री विजय शर्मा, वन अउ पर्यावरण मंत्री केदार कश्यप, जगदलपुर विधायक किरण देव के संग जनप्रतिनिधि, पुलिस अउ प्रशासन के बड़े अधिकारी उपस्थित रहिन।
