बस्तर में पहिली बार होही मध्य क्षेत्रीय परिषद के उच्च स्तरीय बैठक
- मुख्यमंत्री विष्णुदेव साय ह मध्यप्रदेश के मुख्यमंत्री डॉ. मोहन यादव अउ उत्तराखंड के मुख्यमंत्री पुष्कर सिंह धामी के करिन मयारू स्वागत
- केंद्रीय गृह मंत्री अमित शाह के अध्यक्षता में 19 मई के जगदलपुर में होही 26वीं मध्य क्षेत्रीय परिषद के बैठक
- बैठक से अंतरराज्यीय समन्वय, सुरक्षा अउ बिकास ला मिलही नवा दिसा
रायपुर, मुख्यमंत्री विष्णुदेव साय ह कहिन कि 19 मई 2026 के दिन बस्तर के इतिहास में एक ठन अब्बड़ जरूरी अउ ऐतिहासिक दिन के रूप में दरज होय बर जावत हे। जगदलपुर में पहिली बार केंद्रीय गृह अउ सहकारिता मंत्री अमित शाह जी के अध्यक्षता में मध्य क्षेत्रीय परिषद के 26वीं बैठक रखे गय हे, जेमने कतको राज्य के मुख्यमंत्री सामिल होही।
ए जरूरी बैठक में सामिल होय बर छत्तीसगढ़ पहुंचे मध्यप्रदेश के मुख्यमंत्री मोहन यादव अउ उत्तराखंड के मुख्यमंत्री पुष्कर सिंह धामी के मुख्यमंत्री विष्णुदेव साय ह बड़ी मया अउ आदर से स्वागत करिन। ए बखत मुख्यमंत्री श्री साय ह दुनों मुख्यमंत्री से कतको समसामयिक बिसय ऊपर सुघर गोठ-बात घलो करिन।
मुख्यमंत्री श्री साय ह कहिन कि बस्तर में पहिली बार होवइया ए उच्च स्तरीय बैठक ए इलाका बर गरब अउ बिसवास के बात आय। कभू नक्सली हिंसा के चुनौती से जूझइया बस्तर आज सांति, सुरक्षा अउ बिकास के नवा पहिचान बनावत हे। अइसन समे में देस के बड़े नेता अउ कतको राज्य मन के मुख्यमंत्री के मौजूदगी बस्तर के बदलत सरूप अउ बढ़त बिसवास के चिनहा आय।
मुख्यमंत्री श्री साय ह पूरा बिसवास जताइन कि ए बैठक से अंतरराज्यीय समन्वय ला नवा मजूती मिलही अउ बिकसित, सुरक्षित अउ आत्मनिर्भर बस्तर के निरमाण के दिसा में घलो ए बैठक ऐतिहासिक भूमिका निबाही।
