यूएस इंटरटेनमेंट म रिलीज होईस “ठगिया”, हास्य कलाकार मन के बेजोड़ अभिनय

जय जोहार रायपुर… लॉक डाउन म कलाकार मन ल काम दे के अऊ लोगन मन के मनोरंजन के उद्देश्य से अभिनेत्री उर्वशी साहू ह अपन मनोरंजन चेनल के माध्यम ले नवा नवा विडियो ले के आवत हे , २७ जुलाई के वो ह अपन चेनल म अपलोड करे हे हास्य नाटक “ठगिया”

ये नाटक म अभिनय करे हे प्रदीप शर्मा , संतोष निषाद , लल्ली ठाकुर अऊ उर्वशी साहू ह , कॉमेडी ले भरपूर ये नाटक म गीत संगीत के तडका घलो कमाल के हे , उर्वशी साहू ह किहिस कि ठगिया के शूटिंग अऊ एडिटिंग के कार्य लक्ष्मण यादव ह करे हे ,एमा प्रदीप शर्मा अऊ बोचकू के अभिनय म नवापन देखे ल मिलही ,

एखर शूटिंग राजनांदगांव के जन्गलेशर म करे गे हे , २७ जुलाई के बिहनिया ७ बजे एला अपलोड करे गे रिहिस अऊ देखत देखत एला हजारो दर्शक मन देख के लाइक करे हे , उर्वशी ह आघू किहिस कि निरंतर दर्शक मन के मांग के अनुरूप विडियो बनाय जाही अऊ अपलोड करे जाही.