बरसात के पानी कईसे संजोना हे, बताए बर छत्तीसगढ़ के गांव-गांव म जाहि डेमो यूनिट। मुख्यमंत्री ह देखिस यूनिट के प्रक्रिया।
गर्मी म पानी के कमी ले नई जूझना हे अउ खेत खार बर घलोक पानी राखना हे त बरसात के पानी ला इकट्ठा करेच ला पड़ही, बरसात के पानी ल राखे बर एक सिस्टम अपन घर , बाड़ी या कहीं भी लगाए जा सकत हे। घर बनात समय अगर आप ये रेन वाटर हार्वेस्टिंग सिस्टम ल लगाहू त सरकार अउ कंपनी एमा मदद घलोक करही ।
इहि विषय म शनिवार के एक कार्यशाला राखे गिस जेमा मुख्यमंत्री भूपेश बघेल पधारिन , उहाँ जाय के पहिली हमर मुख्यमंत्री बरसात के पानी ल इकट्ठा करे के डेमो यूनिट ल देखिस अउ प्रसन्नता व्यक्त करिस की अट्ठारह ले बीस हजार लगा के एक साल म एक लाख लीटर पानी जमा करे जा सकथे। ये यूनिट 1200 वर्ग फुट जमीन म लगाए जा सकथे ।
कंपनी के विजय राज सिसोदिया ह मुख्यमंत्री ला यूनिट के प्रक्रिया समझाइस,आज ले ये डेमो यूनिट राज्य के गांव-गांव म जाही अउ लोगन मन ल बताये जाही कि बरसात के पानी ला कईसे इकट्ठा करना हे कहीके।
