गरियाबंद। छुरा ले 15 किलोमीटर दूर एक गांव के मिडिल स्कूल म प्रधानपाठक के द्वारा छात्रा मन ला कमरा म बंद करके उंकर संग अश्लील हरकत करे के मामला सामने आए हे। घटना बीते शनिवार के हरे।
प्रधानपाठक के खिलाफ जांच करके रिपोर्ट जिला शिक्षाधिकारी एसएल ओगरे ला भेज दे गे हे। ओगरे के कहना हे कि जांच रिपोर्ट के आधार ले आरोपी ला निलंबित करे के तैयारी करे जावत हे।
पीड़ित छात्रा मन के कहना हे कि प्रधानपाठक ले ओमन बहुत परेशान हें। आए दिन ओहा अइसने शराब पीके स्कूल आथे अउ गलत व्यवहार करथे। छात्रा मन हा मांग करे हें कि स्कूल म महिला प्रधान पाठिका अउ महिला शिक्षिका मिलना चाही।
छात्रा मन बताईन कि स्कूल के प्रधानपाठक हा 20 जुलाई के नशा म धुत होके स्कूल पहुंचिस अउ स्कूल आतेच ही उपस्थित छात्रा मन ला कमरा म बंद कर दिस अउ अश्लील हरकत करिस। जेकर ले घबराके छात्रा मन चिल्लाईन, त बाहिर म मौजूद एक छात्र हा कइसनो करके दरवाजा ला खोलिस।
एकर बाद रोवत-रोवत छात्रा मन तुरंत घर भागिन अउ अपन पालक मन ला पूरा घटना ला बताईन। आक्रोशित पालक मन अउ ग्रामवासी मन स्कूल पहुंचके प्रधानपाठक ला खूब खरी खोटी सुनाईन। ओकर बाद विकासखंड शिक्षा अधिकारी श्याम चन्द्राकर अउ संकुल समन्वयक पंकज साहू ले एकर शिकायत करिन।
संकुल समन्वयक पंकज साहू तत्काल स्कूल पहुंचिन। ओमन छात्रा मन ले पूछिस त सबो झन रो-रोके पूरा घटना ला बताईन। संकुल समन्वयक हा छात्रा मन के बयान के आधार ले रिपोर्ट तैयार करके विकासखण्ड शिक्षा अधिकारी (बीईओ)ला सौंप दे हें।
बीईओ के कहना हे कि मामला के जांच करके प्रधानपाठक के खिलाफ रिपोर्ट तैयार करके जिला अधिकारी ला भेज दिए गे हे, जइसे ही कोई आदेश आही, कार्रवाई करे जाही।
No Comment! Be the first one.