येखर सेती विधायक अउ गांव वाले मन करिन जल सत्याग्रह

सरगुजा । काली एक महिला के नदी म डूब के मउत होय के बाद  म आज बिहनिया विधायक चिंतामणि महराज अउ लवईडीह गांव के गांववाले मन प्रसासन के खिलाफ जल सत्याग्रह करत प्रदर्सन करिन हे। खबर के सूचना मिले के बाद एसडीएम अजय त्रिपाठी व सिटी एसपी आरएन यादव  ह विधायक चिंतामणि  महराज अउ गांव वाले मन ल समझा बुझाके पानी ले बाहिर निकलिस। गांव वाले मन ह  प्रसासन ले दू गाँव के बीचम  नदी म पुल बनाय अउ बोट देय के मांग करिन हे। उहे मृतक के परिवार ल 20,000 के सहायता रासि एसडीएम अजय त्रिपाठी अउ जनपद सीईओ ह दीन हे।

एसडीएम ह गांववाले के सिकायत सुनिस अउ उमन ल पानी ले बाहर आय के निवेदन करत हुए कहिन के ये क्षेत्र ल लेके प्रसासन अलर्ट हे अउ जल्द ही गांव वाले मन के सबो मांग मन ल पूरा करे जाही।आज ले  इहां बोट के इंतज़ाम कर दे जाही अउ जल्द ही पुल के निरमान कर दे जाही।