गणतंत्र दिवस के अवसर म राजभवन म होहि स्वागत समारोह, तैयारी बर होइस बइठका

रायपुर। गणतंत्र दिवस के अवसर म 26 जनवरी 2025 के राज्यपाल रमेन डेका के गरिमामय उपस्थिति म राजभवन म शाम 5:15 बजे ले ‘‘स्वागत समारोह‘‘ के  आयोजन करे जाहि । जेमा स्वतंत्रता संग्राम सेनानी मन ल, पद्मश्री, पद्मभूषण ले सम्मानित राज्य के नागरिक, जनप्रतिनिधी मन सहित गणमान्य नागरिक मन ल आमंत्रित करे जाहि।
    राजभवन म गणतंत्र दिवस के अवसर म संध्याकाल म ‘एट होम फंक्शन‘ कार्यक्रम आयोजित करे जाहि। ए कार्यक्रम के तैयारी बर आज राज्यपाल के सचिव यशवंत कुमार ह विभिन्न विभाग के बइठका लिन। ओमन ह संबंधित अधिकारी मन ल आवश्यक दिशा-निर्देश दिस।
    गणतंत्र दिवस समारोह के बेर राजभवन परिसर अउ आस-पास के साफ-सफाई, स्वच्छ पेयजल, रोशनी अउ झालर व्यवस्था, ट्रैफिक, सुरक्षा अउ कानून व्यवस्था, पार्किग व्यवस्था, विद्युत व्यवस्था, आमंत्रण पत्र के मुद्रण अउ वितरण अउ अन्य व्यवस्था के संबंध म घलो आवश्यक निर्देश दिन।
    बइठका म रायपुर जिला के प्रशासन अउ पुलिस के अधिकारी, राजभवन के अधिकारी, नगर निगम, लोकनिर्माण, लोक स्वास्थ्य यांत्रिकी विभाग, बिजली, उद्यानिकी, आयुष विभाग के अधिकारी अउ कर्मचारी उपस्थित रहिन।