कोन होही छत्तीसगढ़ म बीजेपी के नवा अध्यक्ष , तीन नेता के नाम चलत हे आघू

जय जोहार रायपुर.. छत्तीसगढ़ म भाजपा संगठन म जल्द बड़ा परिवर्तन होए वाला हे, ये परिवर्तन म पहला पड़ाव होही प्रदेश अध्यक्ष के पद, जेमा विजय बघेल, ओपी चौधरी अऊ रामविचार नेताम के नाम प्रमुखता से ले जात हे, कयास लगाये जात रिहिस कि छत्तीेसगढ़ म ए बार ओबीसी या आदिवासी चेहरा ल बीजेपी के कमान सौंपे जा सकथे,

जहां तक विजय बघेल अऊ ओपी चौधरी के बात करे जाय त ये दोनों नेता ओबीसी वर्ग के आय, रामविचार नेताम छत्तीसगढ़ के प्रमुख आदिवासी नेता हे , नेताम 2008 ले 2013 तक रमन सिंह मंत्रीमण्‍डल म गृहमंत्री रह चुके हे, एखर बाद ओमन ल राज्यसभा भेजे गिस, वो बीजेपी के आदिवासी सेल के प्रभारी घलो हावे , ओमन एक साफ-सुथरा छबि के नेता माने जाथे ,

अब देखना होही कि ये तीनों म ले बीजेपी हाईकमान कोन ल बीजेपी के अध्यक्ष मनोनीत करथे , प्रदेश म विजय बघेल एक अइसे चेहरा आय जेखर लोहा बीजेपी के संग कांग्रेस घलो मानथे , विजय बघेल ह दुर्ग ले लगभग 4 लाख रिकॉर्ड वोट ले लोकसभा म विजय हासिल करे रिहीस जब संगठन खेमा कोई मदद नई करत रिहिस, ये फेरबदल के कयास 2018 के विधानसभा चुनाव म पार्टी के करारी हार के बाद ले लगाए जात हे ,

जब धरमलाल कौशिक के पास प्रदेश बीजेपी के कमान रिहिस त बीजेपी धरातल म पहुंचत जात रिहिस, इही कारण रिहिस कि कौशिक ल अध्यक्ष पद ले हटा दे गे रिहिस, धरमलाल कौशिक के बाद विक्रम उसेंडी के कमान संभाले के बाद लोकसभा चुनाव होए के कारण बहुत बड़े परिवर्तन नई होईस , छत्तीसगढ़ के  राजनीति म मौजूदा हालात म भूपेश बघेल के अगुआई म कांग्रेस जेन तरह से आक्रामक राजनीति करत हे ओला देख के लागथे कि बीजेपी ल अपन रननिति बदले के जरुरत हे .