काबर पूरा सराबंदी म जोर देवत हे महिला मन ..पढ़व खबर

रायपुर : छत्तीसगढ़ बर सराबबंदी एक राजनीतिक मुद्दा बनके रही गेहे. उहें पूरा सराबबंदी कब तक होही. ए अपन आप म एक बड़का सवाल हे. एती एक सरवे  म छत्तीसगढ़ देसभर म सबले जादा सराब के सेवन करया राज्य बन गेहे. ए गंभीर बिषय म महिला मन  ह सराबबंदी के समर्थन करत हे.

केंद्रीय सामाजिक अउ सहकारिता मंत्रालय के तरफ ले जारी करे गे ए रिपोर्ट म ए बात आघू आइस हे के छत्तीसगढ़ सराब सेवन म अव्वल हे. उहें ए सर्वे म हमन छत्तीसगढ़ के महिला मन ले बात करेन अउ उंखरन राय जाने के कोशिश करेन. महिला मन ह एक सिरा ले सराबबंदी के समर्थन करिन हे.

महिला मन के कहिना हे के, ‘सराब के वजह ले घर टूटत हे, अपराध बढ़त हे अउ स्वास्थ्य म घलो बुरा असर पड़त हे, युवा मन ले लेके वयस्क तक सबो सराब के नसा म अपन जिनदगी बरबाद करत हवय. अइसे म  बेहद जरूरी हवय के सराबबंदी करे जाना चाही’. अब देखना ए होही के ए रिपोर्ट के बाद सराबबंदी के वादा कर सत्ता म आए  कांग्रेस सरकार का ठोस कदम उठात है.