पर स्त्री संग रिहिस संबंध, शादी के 40 दिन बाद पत्नी ले छुटकारा पाए बर दोस्त ले लुटवा दिस आबरू 

कवर्धा. कोतवाली थाना क्षेत्र म दुष्कर्म के अजीब मामला सामने आए हे। जिहां पति ह अपन दोस्त ले पहिली तो अपन पत्नी के आबरू लुटवा दिस, एकर बाद 50 रुपया के स्टाम्प म तलाक लेके 50 रुपया के दूसरा स्टाम्प म दूनों के शादी घलो करा दिस। पीड़िता अउ ओकर परिजन मन ला जब ए साजिश के पता चलिस त ओमन थाना म एफआईआर कराए हें।

पुलिस हा धारा 376, 120, 34 के तहत आरोपी पति अउ ओकर दोस्त ला गिरफ्तार कर ले हे। पूछताछ म चौंकाने वाला तथ्य सामने आए हे। पुलिस ले मिले जानकारी के मुताबिक आरोपी खिलेन्द्र पिता बिजेन्द्र साहू (19) ग्राम पीपरटोला थाना सिंघनपुरी के रहइया आय। 40 दिन पहिली ही पीड़िता के संग ओकर शादी होए रिहिस।

शादी के समय पीड़िता नाबालिग रिहिस अउ आरोपी पति के उमर घलो 19 साल हे। पराई स्त्री के संग अफेयर (प्रेम संबंध) के चक्कर म वो हा अपन पत्नी ले छुटकारा पाना चाहत रिहिस हे। ए कारण अपन दोस्त कमलेश पिता गजेलाल साहू (29) निवासी ग्राम नचनिया साल्हेवारा (राजनांदगांव) के मदद लिस।

घटना 27 जून के हरे। आधार कार्ड बनवाए के झांसा देके आरोपी खिलेन्द्र हा अपन पत्नी ला लेके कवर्धा पहुंचिस। ओकर दोस्त आरोपी कमलेश घलो उंकर साथ म रिहिस। तहसील ऑफिस म दू ठन स्टाम्प म पीड़िता के दस्तखत ले लिन। एक स्टाम्प हा तलाक संबंधी अउ दूसरा स्टाम्प हा आरोपी कमलेश के संग विवाह के रिहिस। नोटरी कराए के बाद लक्ष्मी लॉज म रुकिन। कुछ देर बाद खिलेन्द्र हा दोस्त कमलेश के साथ पत्नी ला छोड़के चल दिस। इही दौरान कमलेश हा ओकर संग दुष्कर्म करिस।

दुष्कर्म के बाद आरोपी पति खिलेन्द्र हा पीड़िता ला ओकर मइके म छोड़ दिस। कुछ दिन बाद ओकर दोस्त कमलेश हा पीड़िता के मइके पहुंच गे अउ स्टाम्प म शादी करे के हवाला देवत ओला लिवाय बर आए के बात किहिस। तब ये साजिश के पता चलिस। ये मामला म सामाजिक बैठक होईस, लेकिन आरोपी खिलेन्द्र हा कलंकित होगे काहत पत्नी ला साथ रखे ले इनकार कर दिस। तब थाना म रिपोर्ट दर्ज कराए गिस।

पीड़िता के पति आरोपी खिलेन्द्र के कहना हे कि 27 जून के पत्नी के आधार कार्ड बनवाए बर कवर्धा जवइया रिहिन। बरसा के अंदेशा देख के पत्नी ला बस ले कमलेश संग भेज दिस। बाद म कवर्धा पहुंचिस त गार्डन म ओकर पत्नी के गोदी म सिर रख के कमलेश हा लेटे रिहिस। दूनों के रजामंदी ले स्टॉम्प म शादी करा दिस। एकर बाद लॉज म उंकर संबंध बनिस।

जबकि आरोपी कमलेश के कहना हे कि खिलेन्द्र हा ओला अइसे करे बर केहे रिहिस। काबर कि वो हा अपन पत्नी ले छुटकारा पाना चाहत रिहिस। कड़ा सामाजिक नियम के कारण पत्नी ले सीधा-सीधा अलग नई हो सकतिस। ए कारण ये नाटक रचिस। ओकर पत्नी ला लाने बर मइके पहुंचिस त परिजन मन एला गलत ठहरावत थाना में रिपोर्ट कर दिन।

पीड़िता हा पुलिस ला बताईस कि ओकर पति अउ ओकर दोस्त मिलके साजिश रचिन अउ जानबूझ के ओकर साथ अइसे करिन। 40 दिन पहिली शादी होय रिहिस। पीड़िता हा 11वीं तक पढ़े हे। शादी के 10-15 दिन तक तो सब ठीक-ठाक चलत रिहिस। लेकिन ओकर बाद पति खिलेन्द्र के व्यवहार बदलगे। धमकी देवय।

एक दिन स्मार्ट कार्ड बनवाए बर कवर्धा जाए के बात करिस। बाइक से निकलिन। लेकिन खिलेन्द्र हा ओला बस म बइठा दिस। इही बस म खिलेन्द्र के दोस्त कमलेश घलो रिहिस। बस म बइठाए के बाद कवर्धा म मिले बर कहिस। एकर बाद पीड़िता अउ कमलेश कवर्धा के काली गार्डन पहुंचिन।

3 घंटा बाद ओकर पति उहां आईस अउ वीडियो बनाए लगिस। धमकाईस। दूसर दिन ओला कवर्धा लेके आईस। जान से मारे के धमकी देके दस्तखत कराईस अउ होटल म ले गे। उहां थोड़ देर म आवत हंव कहिके चले गिस अउ वापिस नई आईस। इही दौरान ओकर दोस्त हा दुष्कर्म करिस। पीड़िता के कहना हे कि दूनों झन मिलके साजिश रचे रिहिन अउ जानबूझके कमरा म ओला छोड़ दिन।

एकर बाद वो हा अपन मइके चले गे। उहां घटना के जानकारी दिस। एती, ओकर पति के दोस्त कमलेश हा ओला अपन संग ले जाए के दबाव बनाए लगिस। तब पीड़िता हा परिजन मन के संग थाना पहुंचिस।

ये मामला म एसपी डॉ. लाल उमेद सिंह के कहना हे कि साजिश के तहत दूनों आरोपी मन दुष्कर्म के घटना ला अंजाम दिन। पीड़िता ला धोखा म रखके स्टाम्प म दस्तखत ले लिन। ओकर बाद लॉज म ले जाके दोस्त के मदद ले पीड़िता के आबरू लुटवाईस। फिलहाल दूनों आरोपी गिरफ्त म हे।