रावनडिग्गी म वन्यप्राणी सांभर के होइस मौत, वन विभाग ह करिन अंतिम संस्कार

जय जोहार…. वनमण्डल गरियाबन्द के नवागढ़ वन परिक्षेत्र के अंतर्गत ग्राम रावनडिग्गी म बीते शाम करीब चार ले पांच साल के सांभर के मौत हो गे हे। जेखर विभाग ह पोस्टमार्टम के बाद आज अंतिम संस्कार कर दे हे। चिकित्सक ह पोस्टमार्टम रिपोर्ट म सांभर के हार्टअटैक ले मौत होना बताय हे।

वन विभाग ले जानकारी के अनुसार मंगलवार शाम वन्यप्राणी सांभर ह गांव के पास जंगल म विचरण करत रिहिस। ए दौरान गांव के छह कुत्ता ह सांभर ल देख के दौड़ा दिस, जेखर ले अपन जान बचाय बर सांभर ह गांव के हैंडपंप ले टकरा गिस। फेर गांव के एक घर म लकड़ी के बाड़े म फंस गिस।

ए घटना ल देख के ग्रामीण मन ह कुत्ता ले सांभर के जान ल बचाय हे अऊ घटना के जानकारी ल वन विभाग के अधिकारी मन ल दे हे। सूचना म वन अमला ह मऊका म पहुंचिस, त वन्यप्राणी सांभर ह मर चुके रिहिस। विभाग ह आज पंचनामा के बाद बुधवार बिहनिया शव के अंतिम संस्कार कर दे हे।
प्रभारी एसडीओ मनोज चन्द्राकर ह बताइस कि ग्रामीण मन के तरफ ले घटना के सूचना मंगलवार शाम के दे गिस। सूचना म तुरंत मऊका म वन अमल ह पहुंचिस, लेकिन सांभर के मौत हो गे रिहिस।

आज पशु चिकित्सक के तरफ ले पोस्टमार्टम के बाद अंतिम संस्कार कर दे गे हे। चिकित्सक ह बताइस कि सांभर के मौत हार्टअटैक ले होय हे।