पूर्व गृहमंत्री ह करिन कथित जमीन घोटाला के शिकायत, मुख्यमंत्री ह दिन जांच के आदेश
रायपुर. पूर्व गृहमंत्री ननकीराम कंवर ह मुख्यमंत्री भूपेश बघेल ले एक कंस्ट्रक्शन कंपनी के संचालक के खिलाफ कथित जमीन घोटाला के शिकायत करे हे। मुख्यमंत्री ह ये शिकायत ल गंभीरता से लिन अउ एखर जांच के आदेश दे हे। शिकायत म आरोप लगाए हे कि वॉलफोर्ट सिटी कंस्ट्रक्शन कंपनी के संचालक पंकज लाहोटी ह कलेक्टर ले बिना अनुमति ले सरकारी जमीन ल खरीदे अउ बेचे हे।
पूर्व गृहमंत्री कंवर ह शिकायत म बताए हे कि बिल्डर ह अपन करीबी गोपाल सोनकर, राजीव सोनकर अउ तत्कालीन राजस्व अधिकारी घनश्याम शर्मा, पटवारी सनत पटेल के संग मिलके पाटन तहसील के गांव महुदा म करीब 38 एकड़ जमीन खरीदे हे, जेखर कीमत एक अरब 14 करोड़ रूपया ले जादा हे। सरकार ह 10 भूमिहीन किसान मन ल जीवनयापन बर ये 38 एकड़ सरकारी जमीन ल दे रहीस, जेला वॉलफोर्ट ग्रुप ह क्षेत्र म कॉलोनी बनाय बर खरीदे हे।
शिकायत म बताए हे कि नियम म ये हाबय कि भूमिहीन किसानों को आबंटित जमीन ल खरीदे बर कलेक्टर ले अनुमति लेना जरूरी हे, ये प्रक्रिया ले बांचे बर बिल्डर ह पहिली अपन आदमी मन ले जमीन ल खरीदवईस अउ फेर ओला वॉलफोर्ट सिटी के नाम म ट्रांसफर करा लिस। जमीन ल खरीदे के बाद वॉलफोर्ट कंपनी ह रजिस्ट्री नई करा के कंपनी टू कंपनी ट्रांसफर कर लिस, जेखर कारण राजस्व म भारी नुकसान होय हे।
