साय सरकार के पहल ले सशक्त होइन महिला मन: हमेश्वरी राठौर बनिन “लखपति दीदी”

रायपुर. छत्तीसगढ़ मा विष्णुदेव साय के अगुवाई मा महिला मन ला सशक्त अउ आत्मनिर्भर बनाय बर जऊन कोसिस करे जात हे, ओखर अब बढ़िया परिणाम दिखे ला धर ले हे। इही के एक सुग्घर उदाहरण गौरेला विकासखंड के ग्राम पंचायत लालपुर के हमेश्वरी राठौर हें, जऊन आज “लखपति दीदी” के रूप मा अपन चिनहारी बना चुके हें।

एक साधारण गांव के महिला ले आत्मनिर्भर उद्यमी (बिजनस वाली) बने तक के ओखर सफर संघर्ष,, हिम्मत अउ सफलता के एक मिसाल आय। हमेश्वरी राठौर ह “रिद्धी-सिद्धी स्वसहायता समूह” ले जुड़िन, जिहां ओमन ला छत्तीसगढ़ राज्य ग्रामीण आजीविका मिशन के तहत आर्थिक मदद अउ ट्रेनिंग मिलीस। समूह के माध्यम ले ओमन ह 5 लाख 50 हजार रूपया के लोन (ऋण) लीन, जऊन ह ओखर जिंदगी ला बदले के अधार बनिस।

ए पइसा के उपयोग ओमन खेती-किसानी अउ छोटे बिजनस ला बढ़ाए मा करिन। साग-भाजी के उत्पादन ला आय के मुख्य जरिया बनावत ओमन टमाटर, गोभी, आदा, बरबट्टी अउ हरदी कस फसल मन के खेती सुरू करिन। संग मा, ओमन सेंटरिंग प्लेट के काम घलो सुरू करिन, जेखर से ओखर कमाई के अउ रस्ता खुल गे।

सुरू-सुरू मा मौसम के भरोसा नई होय के सेती, बजार के चुनौती अउ लागत कस कतकोन मुसकिल आघू आईन, फेर विष्णुदेव साय सरकार के योजना मन ले मिले मार्गदर्शन अउ स्वसहायता समूह के साथ ह ओमन ला हमेसा आघू बढ़े के हिम्मत दीस। अपन मिहनत अउ पक्का इरादा के दम मा ओमन हर बाधा ला पार कर डारिन।आज हमेश्वरी राठौर के बछर भर के कमाई लगभग डेढ़ ले दो लाख रूपया तक पहुंच चुके हे, जेखर से ओमन “लखपति दीदी” बन गे हें। ओखर सफलता ह न केवल ओखर परिवार के आर्थिक हालत ला मजबूत करिस हे, बल्कि ओ हा इलाका के दूसर महिला मन बर घलो एक प्रेरणा बन गे हे।हमेश्वरी राठौर के ये उपलब्धि देखाथे कि विष्णुदेव साय सरकार के महिला मन बर चलाय योजना अउ स्वसहायता समूह के मजबूत नेटवर्क ह गांव के महिला मन ला आत्मनिर्भर बनाके ओखर जिंदगी मा नीक बदलाव लावत हे।