जिला अस्पताल कबीरधाम बनिस भरोसा के केंद्र, स्वास्थ्य सुविधा मा ऐतिहासिक सुधार

• उप मुख्यमंत्री विजय शर्मा के अगुवाई मा कबीरधाम जिला अस्पताल ह अपन तस्वीर बदल डारिस हे।
• कबीरधाम जिला अस्पताल बनिस नीक इलाज के चिनहारी
• कबीरधाम जिला अस्पताल जिला के संग-संग मध्यप्रदेश के डिंडोरी अउ मंडला जिला के मनखे मन बर “जीवन रेखा” बन गे हे।

रायपुर. कबीरधाम जिला के जिला अस्पताल अब सिरिफ एक ठन सरकारी स्वास्थ्य केंद्र नई रह गे हे, बल्कि आम जनता के बिसवास अउ नीक इलाज के एक मजबूत चिनहारी बन चुके हे। बीते कुछ बछर मा इहां स्वास्थ्य सुविधा मा जऊन बड़े सुधार होय हे, ओखर से न केवल जिला के मनखे मन के भरोसा बढ़िस हे, बल्कि निजी अस्पताल मन के आघू मा घलो एक मजबूत विकल्प के रूप मा ये हा खड़ा हो गे हे।

उपमुख्यमंत्री विजय शर्मा के लगातार कोसिस, मार्गदर्शन अउ सक्रियता ले अस्पताल मा संसाधन मन के विस्तार, नवा मशीन मन के आवई अउ व्यवस्था मा सुधार संभव हो पाय हे। बछर 2023 के तुलना मा बछर 2025 तक लगभग हर बड़े स्वास्थ्य सेवा मा बढ़िया बढ़ोत्तरी दर्ज करे गे हे, जऊन अस्पताल के काम करे के तरीका, संसाधन अउ सेवा के गुनवत्ता मा आय नीक बदलाव ला देखाथे।

ओपीडी अउ आईपीडी मा रिकॉर्ड बढ़ोत्तरी

जनवरी 2023 ले दिसंबर 2023 तक ओपीडी (OPD) मा मरीज मन के संख्या 1,19,557 रहीस, उहें जनवरी 2025 ले दिसंबर 2025 के बीच ये संख्या बढ़ के 1,64,712 तक पहुंच गे। ये लगभग 45 हजार ले जादा के बढ़ोत्तरी आय, जऊन ये बात के निसानी आय कि मनखे मन अब जिला अस्पताल के सेवा ऊपर जादा भरोसा करत हें।

इही कस आईपीडी (IPD) के आंकड़ा मा घलो बढ़ोत्तरी देखे ला मिले हे। बछर 2023 मा जिहां 11,742 मरीज भरती होय रीहिन, उहें 2025 मा ये संख्या बढ़ के 13,253 हो गे। ये हा देखाथे कि गंभीर बीमारी के इलाज बर घलो लोगन मन अब प्राइवेट अस्पताल के जगा जिला अस्पताल ला पहिली चुनत हें।

जचकी (प्रसव) सेवा मा घलो सुधार

लइका अउ महतारी मन के स्वास्थ्य सेवा मा घलो जिला अस्पताल ह बड़े तरक्की करे हे। बछर 2023 मा जिहां 3,001 जचकी होय रहीस, उहें 2025 मा ये संख्या बढ़ के 3,925 हो गे। ओखर से ये पता चलथे कि जचकी सेवा अब अस्पताल मा जादा सुरक्षित, भरोसेमंद अउ सुग्घर हो गे हे।

सोनोग्राफी सेवा मा क्रांतिकारी बदलाव

जिला अस्पताल के सबले बड़े उपलब्धि मन मा ले एक सोनोग्राफी सेवा मा होय सुधार आय। बछर 2023 मा जिहां सिरिफ़ 874 सोनोग्राफी होय रहीस, उहें 2025 मा ये संख्या बढ़ के 7,244 तक पहुंच गे। ये हा लगभग आठ गुना बढ़ोत्तरी आय, जऊन न केवल नवा मशीन मन के होय ला, बल्कि बड़े डॉक्टर अउ तकनीशियन मन के नीक व्यवस्था ला घलो देखाथे। ये उपलब्धि जिला अस्पताल बर एक ‘मील के पत्थर’ साबित होय हे।

एक्स-रे, सिटी स्कैन अउ लैब टेस्ट मा घलो तेजी

एक्स-रे सेवा के बात करबो त बछर 2023 मा 9,865 एक्स-रे करे गे रहीस, जबकि 2025 मा ये संख्या बढ़ के 13,920 हो गे। ओखर ले साफ पता चलथे कि जांच के सुविधा अउ ओखर गुनवत्ता, दूनों मा सुधार होय हे। लैब टेस्ट के आंकड़ा घलो गजब हे; बछर 2023 मा जिहां 2,10,186 जांच होय रहीस, उहें 2025 मा ये संख्या बढ़ के 3,62,113 हो गे। ये हा लगभग डेढ़ गुना बढ़ोत्तरी आय। संग मा, जुलाई 2025 ले अब तक 1,462 लोगन मन के सिटी स्कैन घलो करे गे हे। ये हा बताथे कि अस्पताल मा आज के जमाना के जांच सुविधा अउ तेज सेवा मनखे मन ला मिलत हे।

मोतियाबिंद ऑपरेशन मा घलो बढ़ोत्तरी

आंखी के इलाज मा घलो जिला अस्पताल ह अपन पकड़ मजबूत करे हे। बछर 2023 के तुलना मा 2025 मा मोतियाबिंद के 216 जादा ऑपरेशन करे गे हें। ओखर ले ये साफ होथे कि आंखी के मरीज मन ला घलो अब पहिली ले बढ़िया अउ सुलभ इलाज मिलत हे।

उप मुख्यमंत्री के लगातार कोसिस ले मिलीस नीक सुविधा

जिला के विधायक अउ राज के उपमुख्यमंत्री विजय शर्मा के कोसिस, मार्गदर्शन अउ सक्रियता ले अस्पताल मा संसाधन मन के विस्तार, नवा मशीन मन के आवई अउ व्यवस्था मा सुधार संभव हो पाय हे। ओमन न केवल अस्पताल के बुनियादी ढांचा ला मजबूत करे मा धियान दीन, बल्कि ये घलो पक्का करिन कि मरीज मन ला बखत मा अउ बढ़िया इलाज मिलय। स्वास्थ्य सेवा मन के विस्तार अउ सुधार ओखर प्राथमिकता मा हमेसा सबले ऊपर रहीस हे।

डॉक्टर अउ कर्मचारी मन के भूमिका

जिला अस्पताल के मेहनत डॉक्टर अउ कर्मचारी मन के लगन ये सफलता के कहानी के एक बड़े हिस्सा आय। उपलब्ध संसाधन मन के नीक उपयोग करके ओमन अपन जिम्मेदारी ला पूरा निष्ठा अउ समर्पण के संग निभाय हें। डॉक्टर मन के तत्परता, नर्सिंग स्टाफ के देखभाल अउ बाकी कर्मचारी मन के काम करे के तरीका ह मिलके अस्पताल के रूप-रंग ला पूरा बदल डारिस हे।

अस्पताल मा बढ़िया संसाधन उपलब्ध

जिला अस्पताल मा नीक सेवा, आज के जमाना के आधुनिक मशीन अउ अनुभवी डॉक्टर मन के होय ले, मनखे मन ला मुफ्त मा बढ़िया इलाज मिलत हे। ये हा गरीब अउ मध्यम वर्ग के लोगन मन बर एक बड़े राहत बनके आघू आय हे। ओखर ले न केवल मनखे मन के पइसा बाचत हे, बल्कि ओमन ला अपन ही जिला मा बड़े अस्पताल कस स्वास्थ्य सुविधा मिलत हे।

भविष्य के संभावना

जिला अस्पताल कबीरधाम के ये सफलता सिरिफ आज तक सीमित नई हे, बल्कि ये हा भविष्य बर घलो एक मजबूत नेव (नींव) तइयार करत हे। नवा तकनीक के उपयोग, विशेषज्ञ डॉक्टर मन के नियुक्ति अउ मरीज मन बर अउ नीक सुविधा के विस्तार, ये जम्मो कदम ए डाहर बहुत महत्वपूर्ण हे। जिला अस्पताल के तरक्की सिरिफ आंकड़ा तक सीमित नई हे, बल्कि ये हा मनखे मन के भरोसा, बढ़िया इलाज अउ कर्मचारी मन के मिहनत के कहानी आय।

ओपीडी, आईपीडी, जचकी, सोनोग्राफी, एक्स-रे, सीटी स्कैन, लैब जांच अउ ऑपरेशन, हर क्षेत्र मा अस्पताल ह अब्बड़ सुग्घर काम करत हे। ये अस्पताल अब सिरिफ कबीरधाम जिला के मनखे मन बर नई, बल्कि मध्यप्रदेश के डिंडोरी अउ मंडला कस सीमावर्ती इलाका के लोगन मन बर घलो ‘जीवन रेखा’ बन गे हे।