chhattisgarh : वर्ल्ड इकोनामिक फोरम ह करीन छत्तीसगढ़ के तारीफ, वन संरक्षण बर करे जावत काम ल मिलीन सराहना
जय जोहार । (chhattisgarh) वर्ल्ड इकोनामिक फोरम डहार ले विश्व स्तर म वन ट्रिलियन ट्री योजना म काम करे जावत हे । ए योजना के अंतर्गत वर्ल्ड इकोनामिक फोरम पर्यावरण संरक्षण के क्षेत्र म काम करत हे । छत्तीसगढ़ म पर्यावरण संरक्षण ल अउ कइसे बेहतर बनाये जात हे, ए संबंध म वन ट्रिलियन ट्री कार्यक्रम के प्रमुख निकोल सेवाड के संग मुख्यमंत्री भूपेश बघेल वीडियो कांफ्रेंसिंग के माध्यम ले परिचर्चा म सामिल होइन । ए परिचर्चा म भारत म वन ट्रिलियन ट्री कार्यक्रम के संचालक सुश्री रित्विका भट्टाचार्य अउ सुश्री भैरवी जानी ह कार्यक्रम के बारे म मुख्यमंत्री ल जानकारी दीन ।
परिचर्चा म वर्ल्ड इकोनामिक फोरम डहार ले वन ट्रिलियन ट्री के प्रमुख सुश्री निकोल सेवाड ह छत्तीसगढ़ सरकार डहार ले पर्यावरण संरक्षण, ट्री कवर अउ फारेस्ट कवर ल बढ़ाय के क्षेत्र म करे जावत काम बर मुख्यमंत्री भूपेश बघेल के तारीफ करीन । सुश्री निकोल सेवाड ह किहीन कि छत्तीसगढ़ के जंगल ल अर्थव्यवस्था ले जोड़ना एक ठीन महत्वपूर्ण कदम है, जेखर ले पर्यावरण संरक्षण के संग आर्थिक गतिविधि ल घलो बढ़ावा दे जा सकत हे ।
परिचर्चा में मुख्यमंत्री श्री बघेल ह किहीन कि छत्तीसगढ़ म साइंटिफिक तरीका ले वन के संरक्षण अउ भूजल स्रोत ल रीचार्ज करे के काम करे जावत हे, जेखर ले छत्तीसगढ़ के नाला 10 ले लेके 30 सेंटीमीटर तक रीचार्ज होए हे । मुख्यमंत्री ह वर्ल्ड इकोनामिक फोरम के सामने अपन बात रखत हुये किहीन कि छत्तीसगढ़ म लघु वनोपज के क्षेत्र म बेहतर काम करे जावत हे।
