एकात्म परिसर : विधि विधान ले पूजा पाठ करिन डॉ रमन ह

रायपुर। छत्तीसगढ़ बीजेपी ह मिसन 2018 बर एक बार फेर पुराना दफ्तर एकात्म परिसर म भरोसा जताइस हे। पार्टी ह पुराना कारयलय ल सुभ मानके चउथी पारी बर इहां चुनावी शंखनाद करिन हे। पुराना दफ्तर हाइटेक अउ तमाम सुविधा मन ले भरे हवय। सीएम डॉ रमन सिंह समेत पार्टी के बड़ नेतामन ह अपन मवजूदगी म पूरा विधि विधान ले पूजा पाठ करिन।
छत्तीसगढ़ के राजधानी रायपुर के रजबंधा मइदान के एकात्म परिसर म सोमवार के बिहनिया साढ़े दस बजे ले पूजा अरचना के संग बीजेपी के चुनाइ दफ्तर के ओपनिंग होइस। मुख्यमंत्री रमन सिंह ह खुद बीजेपी दफ्तर म चलत पूजा कारयक्रम म पहुंचिन। विधानसभा अध्यक्ष गौरीशंकर अग्रवाल, मंत्री राजेश मूणत, जिलाध्यक्ष राजीव अग्रवाल समेत तमाम नेता मवजूद रहिन हे। इहां हाईटेक वार रूम, स्टूडिय़ो, मीडिया रूम, प्रेस कांफ्रेंस रूम समेत मीटिंग रूम ल खासतउर म नवा स्वरूप म तइयार करे गेहे।
कारयकरता मन ल सीएम ह कहिन के कांग्रेस के कारयकाल म कारयकरता मन ल गिन-गिन के निसाना बनाय गिस हे। प्रदेस के जनता के संग हमार कारयकरता घलो प्रताड़ित रहिन हे। ये कारयलय के संग बहुत स्मृति मन ह जुड़े हवय। सबो कारयकरता मन ल पूरन विजय के संकल्प दोहराय हे। इही संकल्प लेके हम 2018 के विधानसभा चुनाइ म जावइया हन। उमन कहिन के आज 2018 जीत के संकल्प के दिन हे। 65 प्लस सीट जीतके आना हे।
उल्लेखनीय हे के बछर 2013 के चुनाइ के बाद नवा दफ्तर कुशाभाऊ ठाकरे परिसर म बनाय गिस। लेकिन कुछु दिक्कत आघू आइस त पता चलिस के दफ्तर के मुख्य द्वार म ही वास्तुदोस हे। चुनाइ करीब आय के बाद पार्टी ल अइसे लगत हे के रजबंधा मइदान स्थित दफ्तर लकी हे। कुशाभाऊ ठाकरे परिसर डूमरतराई म वास्तु दोस के चलत बीजेपी के काम सध नइ रहिस हे। ये कारन ले सारा कामकाज रजबंधा मइदान स्थित पुराना कारयलय एकात्म परिसर ले ही करे जात हे।