छोटे भाई ह पटक-पटक के मार डारिस अपन बड़े भाई ल, रूपिया के लेन-देन ल लेके विवाद

जशपुर। दू भाई के बीच रूपिया के लेन-देन ल लेके विवाद हो गे। ये झगरा ह अतेक बढ़गे कि छोटे भाई ह अपन सग्गे बड़े भाई ल पटक-पटक के मार डारिस। ये घटना ह इतवार के फरसाबहार थाना इलाका के ग्राम पंचायत खुटगांव के आश्रित गांव औरीजोर के हरे।

जानकारी के मुताबिक बड़े भाई बालमुकुंद पिता स्व. बिहारी सिंह रौतिया ह अपन छोटे भाई मानसिंह (19 साल) ल कुछ महिना पहिली सहयोग के रूप म पचास हजार रूपिया उधार म दे रिहिस। जब-जब बड़े भाई ह उधारी के रूपिया ल मांगय त वो ह नशा करके गालीगलौज करय। इतवार के संझाकन घलो बालमुकुंद ह पईसा ल लौटाय के मांग करिस। इही बात ल लेके दूनों झन के बीच विवाद हो गे। ये विवाद ह अतेक बढ़गे कि मारपीट के नौबत आगे ताहन छोटे भाई ह अपन बड़े भाई ल पटक-पटक क उंखर गर्दन ल तोड़ दिस, जेकर ले बालमुकुंद के मउत होगे।