प्रतिभा ल अभिव्यक्त करे के बेहतर मंच हे युवा महोत्सव

रायपुर। हर युवा म कुछ न कुछ प्रतिभा कोनो ल कोनो रूप म छिपे रथे। आवश्यकता हे ओला तराशे के। युवा महोत्सव ए मंच प्रदान करथे, ताकि युवा अपन प्रतिभा ल बेहतर ढंग ले अभिव्यक्त कर सकय। ए युवा महोत्सव म छत्तीसगढ़ के जम्मों जिला ले 878 पुरुष अउ 853 महिला सहित 1732 प्रतिभागी शामिल होहि।

     राष्ट्रीय एकता, सामुदायिक सहभागिता अउ भाईचारा म बढ़ोत्तरी अउ राज्य के युवा मन ल कला अउ संस्कृति के क्षेत्र म ज्यादा ले ज्यादा अवसर प्रदान करे के उद्देश्य ले छत्तीसगढ़ के राजधानी रायपुर म राज्य स्तरीय युवा महोत्सव के आयोजन 12 ले 14 जनवरी तक करे जाहि। खेल संचालनालय परिसर अउ पंडित दीनदयाल उपाध्याय ऑडिटोरियम म तीन दिन तक चलइया युवा महोत्सव म 13 प्रकार के विधा ले संबंधित प्रतियोगिता के आयोजन करे जाहि।

     युवा महोत्सव म सांस्कृतिक विधा म सामूहिक लोक नृत्य, सामूहिक लोक गीत, एकल लोक नृत्य, एकल लोक गीत, लाईफ स्किल विधा म कहानी लेखन, चित्रकला, तात्कालिक भाषण, कविता, युवा कृति विधा म विज्ञान मेला, हस्तशिल्प, टेक्सटाईल, कृषि उत्पाद, अन्य विधा म रॉकबैंड आदि शामिल हे।  राज्य युवा महोत्सव के विजेता मन ल नगद पुरस्कार देय जाहि। एखर संग युवा महोत्सव के जम्मों प्रतिभागी मन ल प्रोत्साहित करे जाहि।