पुलिस चेकिंग ले डर के भागत युवक के सड़क हादसा मउत, लाठीचार्ज

जशपुर. जिला के सिटी कोतवाली क्षेत्र म सोमवार बिहनिया ले तनावपूर्ण माहउल बन गे हे. एक युवक के सड़क हादसा म मउत के बाद स्थिति तनावपूर्ण हो गिस हे. बताय जात हे के, पुलिस के चेकिंग के डर ले बाइक सवार युवक तेज रफ्तार म भागे लगिस. इहीं दउरान हादसा के शिकार हो गिस. हादसा के दउरान दूनों युवक मन के हालत गंभीर रहिस हे. जेमा ले एक के मउत हो गिस.

मिले जानकारी म जशपुर के सिटी कोतवाली क्षेत्र म बीते रविवार के संझा पुलिस वाहन मन के चेकिंग करत रहिस हे. इहीं दउरान पुराना नगर के दू युवक एक बाइक म सवार हो के आत रहिन हे. चेकिंग के डर ले युवक भागे लगिस. एखर ले पुलिस ह उमन संदिग्ध समझ के पाछू करिन. एमा युवक ह गाड़ी ल अउ तेज भागइस. इहीं दउरान अनियंत्रित हो के उमन हादसा के शिकार हो गिस. गंभीर रूप ले घायल युवक मन ल इलाज बर झारखंड के रांची ले जाय गिस, लेकिन एक युवक आनंद राम के देर रात मउत हो गिस.

मउत के खबर के बाद ले इलाका म तनावपूर्ण माहउल होगे हे. सोमवार बिहनिया ले ही इलाका के लोग मन ह कोतवाली थाना के घेराव कर दिस. समझाइस देय बर पहुंचे पुलिस वाला मन के संग उंखर झूमाझटकी सुरू हो गिस. बताय जात हे के एखर बाद पुलिस ह लाठीचार्ज कर दिस. लाठीचार्ज के बाद माहउल अउ बिगड़गे हे. कोतवाली के आघू लोग धरना म बइठ गे हे.