आय ले अधिक संपत्ति मामला म अजय चंद्राकर के खेलाफ लगाएगे याचिका तीसर बेर खारिज

रायपुर। पूर्व मंत्री अजय चंद्राकर के खेलाफ आय ले अधिक संपत्ति के मामला म  दाखिल करेगे  याचिका ल बिलासपुर हाईकोर्ट ह बुधवार के खारिज कर दिस। एखर  पहिली कोर्ट ह दू बेर याचिका खारिज कर चुके हे। राजेन्द्र सिंग सामंत के अदालत म 14 नवंबर के केस म बहस पूरा होय के बाद निरनय बर सुरक्षित रख लिय गिस। आप मन ल  बता दन के मनजीत कौर बल अउ कृष्ण कुमार साहू  ह याचिका दायर कर मंत्री चंद्राकर उपर आय ले अधिक संपत्ति होय के आरोप लगात हुए जांच के मांग करे रहिस हे।  

बता दन के एखर पहिली घलो  प्रदेस के पूर्व पंचायत एवं स्वास्थ्य मंत्री अजय चंद्राकर के खेलाफ आय ले  अधिक संपत्ति अर्जित करे के मामला म  याचिकाकर्ता मंजीत कौर बल अउ कृष्ण कुमार साहू ह धमतरी के निचली अदालत म याचिका लगाए रहिन हे।  याचिका म कहे गिस के  चंद्राकर के संपत्ति 2013 म लाखों म रहिस हे, जे अब बढ़के करोड़ों  म हो गेहे।  सुनवाई के बाद निचली अदालत ह याचिका खारिज कर दीस।  एखर बाद हाईकोर्ट म अपील करे गिस । सुनवाई के बाद हाईकोर्ट ले घलो याचिका खारिज होगे। । याचिकाकरता मन ह सुप्रीम कोर्ट म स्पेशल लीव पिटिशन दायर कर सुनवाई के मांग करिन।  सुको ह मामला के दुबारा सुनवाई  बर निचली अदालत ल निरदेस दिस। जिहां एक बेर फेर निचली अदालत ले याचिका खारिज होय के बाद हाईकोर्ट म रिवीजन पिटिसन दायर करे गिस। बुधवार के जस्टिस सामंत के एकलपीठ ह याचिका ल खारिज कर दीस हे।