नेता प्रतिपक्ष बर बीजेपी करत हवय माथापच्ची……. काली विधायक दल के बइठक

रायपुर। एक तरफ जिहां कांग्रेस ह मुख्यमंत्री चुने बर कई दिन लगा दिस हे, उहें भारतीय जनता पार्टी घलो नेता प्रतिपक्ष के चयन नइ कर पात हे।  दिल्ली म होय बइठक के बाद राजधानी म फेर नेता प्रतिपक्ष  ल लेके  माथापच्ची जारी हवय।

दिल्ली म पूर्व मुख्यमंत्री रमन सिंह ह पार्टी के राष्ट्रीय अध्यक्ष अमित शाह ले इहीं बाबत मुलाकात करे रहिस हे। विधायक बृज मोहन अग्रवाल घलो दिल्ली हो आए हे। एती रामपुर ले विधायक अउ पूर्व गृह मंत्री ननकीराम कंवर ह घलो नेता प्रतिपक्ष के बर दावा कर देय हे।

छत्तीसगढ़ म नेता प्रतिपक्ष ल लेके चयन बर केंद्रीय नेतृत्व ह  अब तक पर्यवेक्षक तक तय नइ करे हे जबके गुरुवार के बीजेपी विधायक दल के बइठक होही। नेता प्रतिपक्ष के नाम 3 जनवरी के विधानसभा सचिवालय म भेजना हवय। 4 जनवरी ले विधानसभा सत्र होना हे।