ए वजह ले रायल्टी सासन ल न जाके बिचौलिया मन के जेब मन म

नवनीत शुक्ला, मुंगेली। जिला म अवैध उत्खनन के कारोबार तेजी ले फलत-फूलत हे। खनिज बेभाग के अधिकारी मन के धियान नइ देय ले जगा-जगा मुरूम, चुना, पत्थर अउ रेत उत्खनन व्यापक पइमाना म होवत हे। एखर ले सासन ल  मिलइया आय म चूना लगत हे। क्षेत्र म रेत अउ पत्थर के अवैध उत्खनन परिवहन करे जात हे।  नदी के घाट म रेत अउ आसपास काफी पत्थरा हे।

रेत अउ पत्थर के अवैध कारोबार करइया इहां ले अवैध खुदाई कर वाहन मन म  परिवहन करत हे। गांव-गांव अउ सहर म खदान मन संचालित होवत हे। उहें  जिला म गिने-चुने लोगन मन ल लीज देय गेहे।  आगर नदी म अवैध रूप ले रेत उत्खनन करे जात हे । गांव के बाहुबली लोगन मन ह रायल्टी के रूप म अवैध वसूली करत हे ,  जेखर कोती अधिकारी मन  ह  सिकायत होय  म धियान नइ दे जात हे। मिले जानकारी के अनुसार गांव-गांव म बाहुबली लोग मुरूम अउ रेत के अवैध रूप ले उत्खनन कर बेचत हे। जे सड़क बनाय बर उपयोग म लाय जात हे, जेखर रायल्टी सासन ल न जाके सोझे बिचौलिया मन के जेब मन म जात हे । आगर नदी म जगा-जगा रेत उत्खनन धड़ल्ले  ले करे जात हे। प्रतिदिन बड़ संख्या म टैरक्टर मन ले सप्लाई होवत हे।  बीच-बीच म जब खनिज अमला सक्रियता दिखाथे त अइसे वाहन घलोक पकड़ म आथे।   लेकिन नियमित कार्रवाई नइ होवले ले कुछु दिन बाद घलोक अवैध कारोबार सुरू हो जाथे ।

लंबा बेरा ले कार्रवाई नइ होइस….. लोगन के कहिना हे के एखर उपर नकेल कसे बर खनिज बेभाग ल नियमित कार्रवाई करे के जरूरत हे। क्षेत्र म जब भी ए तरह के कार्रवाई होथे। त कुछु दिन तक अवैध उत्खनन अउ परिवहन बंद कर देय जाथे हे, लेकिन बेरा गुजरे के संग ही फेर  ले अवैध कारोबार सुरू हो जाथे। लंबा बेरा ले क्षेत्र म अवैध पत्थर- रेत उत्खनन के कार्य धड़ल्ले ले चलत हे ।