कांग्रेस के झूठा आरोप मन के पोल खोलिस सुप्रीम कोर्ट ह : डॉ रमन

रायपुर। राफेल विमान सौदा ले लेके सुप्रीम कोर्ट ले मिले बड़ राहत के बाद भाजपा एक बार फेर कांग्रेस उपर हमलावर हवय। भाजपा ने राफेल म कांग्रेस के आरोप मन ल राजनीति ले प्रेरित बताइस हे। पूर्व मुख्यमंत्री डॉ रमन सिंह पत्रकार मन ले चरचा करत हुए कहिन के कांग्रेस राफेल डील म सवाल उठाके राष्ट्रीय सुरक्षा के संग खिलवाड़ करे के कोसिस करत रहिन हे।

सुप्रीम कोर्ट द्वारा राफेल डील म सबो याचिकाएं खारिज करे के बाद  बीजेपी  ह कांग्रेस उपर जमके निशाना साधिस। आज भाजपा कार्यालय म रमन सिंह पत्रकार मन ले चरचा करत हुए कहिन के सुप्रीम कोर्ट के फइसला ले कांग्रेस के झूठा आरोप मन के पोल खोल खुलगे।  आघू उमन कहिन के, कांग्रेस हमेसा फायदा के सियासत करत हुए आरोप लगाथे।  उहीं म  एक आरोप राफेल घलो रहिन हे।  जेमा आज सुप्रीम कोर्ट ह फइसला दे दिस के,  एमा कोनो गड़बड़ी नइ होय हे। इहीं दउरान उमन अपन आघू के राजनैतिक योजना मन बारे म घलो बात करिन।  डॉ. सिंह ले पूछे गिस के छत्तीसगढ़ म  भाजपा के हार के बाद  का  उमन केन्द्र म वापस लउटही। त उमन कहिन के  मैं छत्तीसगढ़ के हव, इहें रह हूं।