बिजली बिल हो ही आधा….. बिजली उपभोक्ता मन मिलही बड़ राहत

 रायपुर । प्रदेस के 50 लाख बिजली उपभोक्ता मन बर  नवां साल खुसखबरी लेके आही।  काबर के कांग्रेस ह अपन घोसना पत्र म बिजली बिल कम करे के ऐलान करे रहिस हे। कांग्रेस के सरकार बने के संग एखर बर कवायद सुरू हो गेहे।  मालूम हो ही के पावर कंपनी हर साल दिसम्बर म टैरिफ म काम करथे। कांग्रेस सरकार  आए के बाद एमा काम सुरू नइ करे गेहे। उहें कंपनी नवां सरकार के निरदेस के इंतजार करत हे। उहें कांग्रेस के घोसना पत्र म किसान मन के करजा माफी के वादा म अमल के प्रक्रिया घलो प्रारंभ हो चुके हे।

दरअसल कांग्रेस ह बिजली के बढ़त कीमत ले लेके हमेसा ले विरोध करिन हे। ए  वजह ले कांग्रेस ह  अपन घोसना पत्र म सामिल करिस के उँखर पार्टी के सरकार बनिस त बिजली बिल आधा कर देय जाही। एती कांग्रेस के घोसना पत्र म अमल होना सुरू हो गेहे। प्रदेस के मुख्य सचिव अजय सिंह ह सबो विभाग के सचिव मन ल कांग्रेस के घोसना पत्र सउपिस हे अउ ओखर उपर अमल करे बर कहे हे। अइसे म  जल्द बिजली बिल के मामला म घलो प्रक्रिया प्रारंभ होही। पावर कंपनी नवां सरकार के निरदेस के इंतजार करत हे। कंपनी के सूत्र मन के कहिना हे बिजली बिल कम करे बर दू तरीका हे। पहिला या त  टैरिफ कम करे जाही या दूसर सरकार एखर बर सब्सिडी देही।  जेखर ले बिजली बिल आधा भेजे जा सकय।

ए बारे म पावर कंपनी ले जुड़े अधिकारी के कहिना हे के प्रदेस सरकार सबो उपभोक्ता मन ल हर माह के बिजली बिल के आधा सब्सिडी दे दीही त उपभोक्ता मन के जतना बिल आही  ओला आधा कर दे जाही।  या फेर वर्तमान म जे टैरिफ चलत हे, ओला आधा कर देय जाही। पावर कंपनी दूनों तरह के प्रस्ताव ल सरकार के आघू रखही। सरकार जेला बेहतर समझही ओखर हिसाब ले पावर कंपनी काम करही।