कवर्धा। जिला के बोडला थाना के खड़ौदाखुर्द म एक किसान ह फांसी लगाके आत्महत्या कर लिस। 24 अप्रैल के मृतक किसान के बेटा अऊ बेटी के बिहाव होवइया रिहिस। परिजन मन के आरोप हे कि ओमन प्रसासनिक तानासाही ले परेसान रिहिन। बिहाव बर ओ ह अपन भुइंया के सउदा करे रिहिस। फेर राजस्व बिभाग ह किसान ल घुमात रिहिस, संग ही पटवारी बड़े नेता मन के धौंस देखा के काम नइ करत रिहिस। परिजन मन के अनुसार किसान ह लोक सुराज अभियान म घलो आवेदन दिस फेर कार्रवाई नइ होइस।
दू महिला मन के संदिग्ध हालत म मउत
जांजगीर के कटौद गांव के एक घर म दू महिला मन के संदिग्ध हालत म मउत होय हे। पुलिस ह दून्नों ल जलाके मारे के आसंका जताए हे। उहें घटना के बेरा घर के बाहिर महिला के 1 बछर के बेटा खेलत रिहिस, अऊ घर के दरवाजा खुले रिहिस। एकर संग ही महिला के पति घटना के बेरा ले गायब हे। सूचना के बाद मउका म पहुंचे पुलिस ह डॉग स्क्वायड टीम के मदद ले मामला ल सुलझाय म जुटे हे। फिलहाल पुलिस फरार युवक के तलास म जुट गे हे। पुलिस के कहिना हे कि युवक ले पूछताछ के बाद मामला के खुलासा हो सकत हे।
पुलिस ह 4 नक्सली मन ल गिरफ्तार करे हे
कोंडागांव म पुलिस ह 4 नक्सली मन ल गिरफ्तार करे हे। पुलिस ल सूचना मिले रिहिस, कि नक्सली अदनार इलाका म डेरा डाले हुए हे, ये आधार म पुलिस ह कार्रवाई करत हुए 4 नक्सली मन ल गिरफ्तार करे हे। एमन कई बड़े वारदात म समिल रिहिन हे। ये उहीं नक्सली हे जेमन 19 मार्च के 4 ग्रामीन मन के अपहरन करे रिहिन, अऊ एमा ले दू लोगन मन ल पीट पीटके मउत के घाट उतार दे रिहिस।
रायगढ़ म पुलिस कंट्रोल म जम्मों समाज के प्रमुख अऊ प्रसासनिक अधिकारी मन के बइठक
सोशल मीडिया म चलत कई तरह के बात ल देखत हुए रायगढ़ म पुलिस कंट्रोल म जम्मों समाज के प्रमुख अऊ प्रसासनिक अधिकारी मन के बइठक होइस। ये बइठक म सहर म शांति अऊ सद्भाव बनाय रखे उपर चर्चा होइस। हाल ही म राम नवमी के दउरान कुछु बिवाद के बात आगु आय रिहिस। ये बात ल लेके कई तरह के चर्चा सोसल मीडिया म चलत रिहिस। जम्मों समाज के डहार ले ये डहार ध्यान नइ दे के बात कहे गिस, अऊ सामाजिक स्तर म कउनो भी तरह के बिवाद ले मना कर दिस हे।
साहू अऊ बल के खिलाफ मानहानि के मुकदमा दर्ज कराए हे मंत्री चंद्राकर ह
मंत्री अजय चंद्राकर ह RTI कार्यकर्ता कृष्ण कुमार साहू अऊ मनजीत कौर बल के खिलाफ मानहानि के मुकदमा दर्ज कराए हे। आप मन ल बता दन कि आय ले जादा संपत्ति मामला म कृष्ण कुमार साहू अऊ मनजीत कौर बल ह मंत्री अजय चंद्राकर के खिलाफ गंभीर आरोप लगाए रिहिस। जेकर खिलाफ कोर्ट पहुंचे अजय चंद्राकर ह कहिस सुप्रीम कोर्ट ह ओकर पक्ष म फइसला दे रिहिस। एकर बाद ओकर खिलाफ कई संगीन आरोप लगाए गिस। जेमा कउनो भी सच्चाई नइ रिहिस।
